(බිඟුන් මේනක ගමගේ) 
 
බාහිර බලපෑම් හේතුවෙන් විදේශ රාජ්‍යවලට සිදු වූ විනාශවලින් පාඩම් උගෙන ගත යුතු යැයි ද ආගමික සංහිඳියාව ඔස්සේ රටේ ප්‍රශ්න රට තුළම විසඳාගැනීමට ලාංකිකයන් කැප විය යුතු යැයි ද කොළඹ අගරදගුරු පදවියේ මාධ්‍ය ප්‍රකාශක බෙනඩික්ට් ජෝෂප් පියතුමාණෝ ‘ලංකාදීප’ යට පැවසූහ.
 
ප්‍රජාතන්ත්‍රවාදය හා නිදහස සම්බන්ධයෙන් ලංකාව පරිණත තත්ත්වයක ඇතැයි ද රට පවතින්නේ තමන්ගේ ප්‍රශ්න තමන්ටම විසඳාගත හැකි තත්ත්වයක යැයි ද උන්වහන්සේ අවධාරණය කළහ.
 
දුකේදී මෙන්ම සැපේදී ද සමාජයේ සංහිඳියාව පවත්වාගෙන යාමට අවශ්‍ය ශක්තිය ප්‍රධාන ආගම් සියල්ලෙන් ලැබෙන බව කී පියතුමාණෝ ක්‍රිස්තියානි දහමේ උගැන්වෙන සහෝදරත්වය හා ප්‍රේමය මෙන්ම බුදු දහමේ උගැන්වෙන මෛත්‍රීය හා අහිංසාව ඊට පදනම් කරගත හැකි යැයි සඳහන් කළහ.
 
මැල්කම් කාදිනල් රංජිත් අගරදගුරුහිමිපාණන් ජාතියේ උන්නතිය යන මූලික අරමුණ වෙනුවෙන් පෙනී සිටින්නේ යැයි ද ඒ වෙනුවෙන් සියලු ශ්‍රී ලාංකිකයන් එක්සිත්ව කටයුතු කරන්නේ නම් ඉතා වටිනේයැයි ද බෙනඩික්ට් ජෝෂප් පියතුමාණෝ වැඩිදුරටත් සඳහන් කළහ.