(මනෝප්‍රිය ගුණසේකර)

වැලිකඩ සිරකරු ඝාතන නඩුවේ විත්තිකරුවකු වන පොලිස් මත්ද්‍රව්‍ය නාශක කාර්යංශයේ හිටපු පොලිස් පරීක්‍ෂක නියෝමාල් රංගජීව විසින් ‘‘මව්බිම‘‘  පුවත්පතේ ඡායාරූප මාධ්‍යවේදී අකිල ජයවර්ධන මහතා කොළඹ මහාධිකරණ පරිශ්‍රයේදී ඇඳගෙන ගොස් අමානුෂික අන්දමින් සැළකූ බව කියන සිද්ධියක් සම්බන්ධයෙන් කොළඹ මහාධිකරණ පොලිස් මුරපොළ විමර්ශනයක් ආරම්භ කොට ඇත.

කොළඹ මහාධිකරණ පරිශ්‍රයේදී තමාගේ ඡායාරූප ගත් බව කියමින් නියෝමාල් රංගජීව විසින් තමා කොළඹ මහාධිකරණ පොලිස් මුරපොළ වෙත ඇඳගෙන ගොස් එහිදී තමාට තර්ජනය කළ බවත් තමාගේ ‘කැමරා චිප්’ දෙක බලහත්කාරයෙන් ලබාගත් බවත් කියමින් ‘මව්බිම’ පුවත්පතේ ඡායාරූප මාධ්‍යවේදී අකිල ජයවර්ධන මහතා මහාධිකරණ පොලිස් මුරපොළට ඉදිරිපත් කළ පැමිණිල්ලකට අනුව මේ පිළිබඳව විමර්ශනයක් ආරම්භ කර ඇත.

‘රාඩා’ ආයතනය වෙත නිකුත් කළ රුපියල් කෝටි 17 කට ආසන්න මුදලක් අවභාවිතා කළ බවට හිටපු පාර්ලිමෙන්තු මන්ත්‍රී ටිරාන් අලස් මහතා ඇතුළු සිව්දෙනෙකුට එරෙහි නඩුව ආවරණය කිරීම සඳහා කොළඹ මහාධිකරණයට පැමිණ සිටියදී තමන් මෙම සිද්ධියට මුහුණපෑ බව අකිල ජයවර්ධන මහතා පැවසීය.

ඒ අවස්ථාවේදී වැලිකඩ සිරකරු ඝාතන නඩුවේ විත්තිකරුවකු වන පොලිස් මත්ද්‍රව්‍ය නාශක කාර්යංශයේ හිටපු පොලිස් පරීක්‍ෂක නියෝමාල් රංගජීව පැමිණි බවත් කාර්යාලයේ අවශ්‍යතා මත ඔහුගේ ඡායාරූප ගත් විට ඔහු තමාගේ කමීසයෙන් අල්ලා ගත් විට තමා ‘මව්බිම’ පුවත්පතේ ඡායාරූප මාධ්‍යවේදීයකු බව කීවත් ඔහු එය ගණනකට නොගෙන මහාධිකරණ පොලිස් මුරපොළ වෙත ඇඳගෙන ගිය බවත් පවසන ඡායාරූප මාධ්‍යවේදී අකිල ජයවර්ධන මහතා එහිදී නියෝමාල් රංගජීව විසින් තමාට අමානුෂික අන්දමින් සැළකූ බවත් තමාගේ ‘කැමරා චිප්’ දෙක බලහත්කාරයෙන් ලබාගත් බවත් සඳහන් කර ඇත.

මේ සම්බන්ධයෙන් කොළඹ මහාධිකරණ පොලිස් මුරපොළේ ස්ථානාධිපති ප්‍රධාන පොලිස් පරීක්‍ෂක උඩුවැල්ල මහතාට ලැබුණු පැමිණිල්ලකට අනුව විමර්ශනයක් ආරම්භ කොට ඇත.