(චන්ද්‍රසේන ගමගේ)
මව සහ පියා නිවසින් බැහැරව සිටි අතරතුර දී නිවසේ රැඳී සිටි 13 හැවිරිදි පාසල් සිසුවෙකු හදිසියේ මිය යාමේ පුවතක් කටුවන වල්ගම්මුල්ල පුවක්ගස් ආර ප්‍රදේශයන් වාර්තා වේ.
මිය ගොස් ඇත්තේ වල්ගම්මුල්ල මහා විද්‍යාලයේ 8 වැනි වසරේ ඉගෙනුම ලැබූ නදුන් නෙත්සර ඩයස් ගුණවර්ධන නම් පාසල් සිසුවා බව පොලීසිය පවසයි.
අද (19) පෙරවරු 8.30 ට පමණ මියගිය පාසල් සිසුවා ගේ පියා සිය ව්‍යාපාරය සඳහා පිටත්ව ගොස් ඇති බවත් මව සහල් ගෙන ඒම සඳහා නිවස ආසන්නයේ පිහිටි වෙළඳසලට ගොස් සිටි බවත් මියගිය සිසුවා නිවසේ තනිව සිට ඇති බවට තොරතුරු ලැබී ඇතැයි පොලිසිය පවසයි.
වෙළඳසැලට ගොස් සිටි මව නැවත නිවසට පැමිණීමෙන් අනතුරු ව නිවසේ ජනේලයක එල්ලී සිටි දරුවා දැක ඇති අතර පසුව ඇය කෑගසා ප්‍රදේශවාසීන් ගෙන්වාගෙන සිසුවා කටුවන ප්‍රාදේශීය රෝහලට රැගෙන ගොස් තිබේ.
රෝහලට රැගෙන යන විට සිසුවා මියගොස් සිටි බවට රෝහල් ආරංචි මාර්ග සඳහන් කරයි. මියගිය සිසුවාගේ මරණය පිළිබඳව සැක පහළ කර ඇති කටුවන රෝහලේ වෛද්‍යවරයා පොලීසියට සිද්ධිය වාර්තාකර තිබේ.
අනතුරුව කටුවන පොලිසිය මියගිය දරුවාගේ මරණය සම්බන්ධයෙන් පරීක්ෂණ ආරම්භකර ඇති අතර පොලිසිය සැක කරන්නේ මියගොස් ඇති සිසුවා ගේ මරණය ඝාතනයක් විය හැකි බවයි. මියගිය සිසුවා මරණය පිළිබඳ පශ්චාත් වෛද්‍ය පරීක්ෂණය සිදු කිරීම සඳහා සිරුර ඇඹිලිපිටිය දිස්ත්‍රික් මූලික රෝහලට යවා තිබේ.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
