ලොව රටවල් රැසක් මේ වනවිට අනුගමනය කරන ‘ලොක්ඩවුන්’ ක්‍රමවේදය අනුගමනය කරමින් අද (26) මධ්‍යම රාත්‍රියේ සිට මසකට රට වසා දැමීමට තීරණය කළ බව නවසීලන්ත අගමැතිනි ජසින්ඩා ආඩ්න් ප්‍රකාශ කළාය.

මෙම කාලයේදී නවසීලන්ත වැසියන් අනිවාර්යයෙන්ම නිවසේ රැඳී සිටිය යුතු යැයිද එය කඩකරන පුද්ගලයන්ට දඬුවම් ලැබීමට සිදුවනු ඇතැයි ද නවසීලන්ත අගමැතිනිය අනතුරු ඇඟවූවාය.

මෙම කාලය තුළ ‘‘තමන්ට කොරෝනා ආසාදනය වී ඇතැයි’’ සලකා කටයුතු කරන්නැයි ද ඇය එරට වැසියන්ගෙන් ඉල්ලා සිටියාය.

අවශ්‍ය වුවහොත් නව නියෝග උල්ලංඝණය කරන පිරිස්වලට එරෙහිව දැඩි ක්‍රියාමාර්ග ගන්නා බව ද ඇය කීවාය.

මිලියන 5කට ආසන්න ජනගහනයක් සිටින නවසීලන්තය අනෙකුත් රටවලට වැඩි දැඩි ක්‍රියාමාර්ග ගෙන ඇත. නවසීලන්තය බදාදා සිට ක්‍රියාත්මක වන පරිදි රට තුළ හදිසි නීතිය ද ක්‍රියාත්මක කර ඇත. එමෙන්ම රට අනතුරු ඇඟවීමේ මට්ටම ඉහළම මට්ටමට ඔසවා ඇත.

විදෙස් ගතව සිට පැමිණෙන නවසීලන්ත සියලු වැසියන් සියලු දෙනා ගුවන් තොටුපොළ හෝටල්වල හෝ ඔවුන් සිටින නගරවල නැවැතී ස්වයං-නිරෝධායන ක්‍රියාවලියට යොමු විය යුතු යැයි ද නවසීලන්ත බලධාරීහු උපදෙස් දී ඇත.

ඒ.එෆ්.පී./රොයිටර්

055