(හිරාන් ප්‍රියංකර ජයසිංහ)
 
ආණමඩුව නගරයේ පැවති දේශපාලන රැළියකට ගොස් කරුවලගස්වැව බලා එමින් සිටි පිරිසක් රැගත් බස් රථයක් නවගත්තේගම කරුවලගස්වැව කුඩා මැදවච්චාය ප්‍රදේශයේදී නතර කළ 20ක පමණ පිරිසක් එහි සිටි මගීන්ට පහර දී ඇති බවත් සිව්දෙනෙකු තුවාල ලබා ඇති බවත් කරුවලගස්වැව පොලිසිය පවසයි.
 
පහර කෑමෙන් තුවාල ලැබූ පිරිස තබ්බෝව රෝහලේ සහ පුත්තලම මුලික රෝහලේ ප්‍රතිකාර ලබන බව පොලිසිය පවසයි.
 
මෙම පිරිස ගමන් කළ ලංගම බස් රථය යන මාර්ගයට ලී කඳන් දමා මග හරස් කර 20කට ආසන්න පිරිසක් මොවුන්ට පහරදී ඇතැයි තුවාලකරුවෝ කියති.
 
මෙම පහර දීමෙන් ලංගම බස් රථයටද හානි සිදුව තිබිණි.
 
පහරදීමට සම්බන්ධ පිරිස් අත්අඩංගුවට ගැනීමට ප්‍රමාද වීම ගැන 100 කට ආසන්න පිරිසක් කරුවලගස්වැව පොලිසියට ගොස් එහි විරෝධය පළකිරීමත් සමග එහි උණුසුම් තත්වයක් හටගෙන ඇත.
 
පසුව එම ස්ථානයට පැමිනි  ශ්‍රී ලංකා පොදුජන පෙරමුනේ ප්‍රියංකර ජයරත්න , සනත් නිශාන්ත හා හිටපු පළාත් සභා මන්ත්‍රිවරුන් වන ආනන්ද සරත් කුමාර ,චින්තක අමල මායාදුන්න යන මහත්වරුන්  ඇතුළු පිරිස එක්වී ජනතාව සමථයකට පත්කිරීමට උත්සහ ගත්හ.
 
පහර කෑමට ලක්වු පිරිස පවසන්නේ තමන්ට කුඩා මැදවච්චිය ප්‍රදේශයේ බස් රථය නවතා අමානුෂික ආකාරයෙන් පහර දුන් බවය.

එම පිරිස පහර දීම සම්බන්ධයෙන් පොලිස්ථානයට පැමිණිලි කළද, පොලිසිය පැවසුවේ මෙය සුළු සිද්ධියක් මුල් කරගනිමින් ඇතිවු ප්‍රශ්නයක් බවයි.