(කාංචන කුමාර ආරියදාස)

දේශීය ලොකු ලූනු කිලෝවක් සඳහා රුපියල් 240 ක ඉහළ තොග මිල අද (07) දඹුල්ල ආර්ථික මධ්‍යස්ථානයේ දී ගොවීන්ට ලැබෙන බව දේශීය ලොක ලූනු ගොවියෝ පවසති.

පසුගිය දින කිහිපයේ දේශීය ලොකු ලූනු කිලෝවක ගැනුම් මිල රුපියල් 85 සිට රුපියල් 130 දක්වා පැවති බවත්, කොරෝනා සිද්ධිය සමග දේශීය ලොකු ලූනු සඳහා ඉහළ ඉල්ලුමක් පැවතීම හේතුවෙන් අද (07) පෙරවරුවේ සිට දේශීය ලොකු ලූනු කිලෝවක ගැනුම් මිල දඹුල්ල ආර්ථික මධ්‍යස්ථානයේ රුපියල් 200 සිට රුපියල් 240 දක්වා වූ ඉහළ මිලකට අලෙවි වන බවත් ගොවීහු කියති.

මෙවර දේශීය ලොකු ලූනු  වගාවට හඳුනා නොගත් රෝගයක්  බෝවීම නිසා සාර්ථක අස්වැන්නක් නොලැබී ගොවීන් අසීරුතාවයකට පත්ව සිටි කාලයක කිලෝවකට රුපියල් 240ක් වැනි ඉහළ මිලක් ලැබීම නිසා යම් මට්ටමකින් තමන්ට ණයතුරුස් ගෙවාගෙන සතුටෙන් ජීවත් වීමට හැකි බව දේශීය ලොකු ලූනු ගොවීහු පවසති.

දඹුල්ල ආර්ථික මධ්‍යස්ථානය අද පෙරවරුවේ සිටම ගොවීන් විශාල වශයෙන් තම අස්වනු අලෙවි කිරීම සඳහා රැගෙන එන ආකාරය දැක ගැනීමට හැකිවිය. ගොවින් කියාසිටියේ වසර කිහිපයකට පසු තමන්ට වචනෙකින් හෝ සතුටු වීමට හැකිවන පරිදි ලොකු ලූනු සඳහා හොඳ ඉල්ලුමක් සහ මිල පවතින බවය. විදේශීය ලොකු ලූනු තොග ද යම් මට්ටමකින් වෙළඳපොලේ පැවතියද ඒවා ප්‍රමාණවත් නොවීම නිසා තම අස්වනු වලට ඉහළ මිලක් ලැබෙන බවත් ගොවීහු පෙන්වා දෙති.

දඹුල්ල ආර්ථික මධ්‍යස්ථානයේ ව්‍යාපාරික ප්‍රජාව කියා සිටියේ දේශීය ලොකු ලූනු ගොවියාට කලකට පසු අතමිට සරුවන හොඳ මිලක් ලූනු  සඳහා ලැබී ඇති බව ය. බොහෝ ගොවීන් දේශීය ලොකු ලූනු වගාව අතහැර දමා තිබුණු අවස්ථාවක සාධාරණ මිලක් ලැබීම නිසා ඉදිරි කන්නවල වගා කිරීම සඳහාද මෙම මිල විශාල  උත්තේජනයක් වනු ඇති බවද වෙළෙන්දෝ පෙන්වා දෙති.

පකිස්ථානයෙන් ආනයනය කරන ලද ලොකු ලූනු තොග ද වෙළඳපළේ යම් මට්ටමක් පවතී. ආනයනික ලොකු ලූනු  කිලෝවක තොග මිල ද රුපියල් 140ක්  යටතේ අලෙවි වන බවත් එහෙත් දේශීය ලොකු ලූනු  සඳහා වෙළෙන්දන්ගේ වැඩි ඉල්ලුමක් පැවතීම නිසා මිල ඉහළ ගිය බවත් ඔවුහු පෙන්වා දෙති.