( තිළිණි ද සිල්වා සහ රංජන් කටුගම්පොළ)

ගෝල්ඩන් කී සමාගමේ තැන්පත්කරුවන්ගේ මුදල් ආපසු ගෙවීම සඳහා මීළඟ අයවැය යෝජනා ඉදිරිපත් කිරීමට පෙර රුපියල් මිලියන 3000ක් වෙන් කිරීමට කටයුතු කරනු ඇතැයි නීතිපති වෙනුවෙන් පෙනී සිටි නියෝජ්‍ය සොලිසිටර් ජනරාල් විරාජ් දයාරත්න මහතා අද(19) ශ්‍රේෂ්ඨාධිකරණයට දැන්වීය.

ගෝල්ඩන් කී සමාගමේ තැන්පත්කරුවන්ගේ මුදල් ආපසු ගෙවීම සඳහා රුපියල් මිලියන 500 ක මුදලක් නිදහස් කිරීමට රජය පොරොන්දු වූ පරිදි කටයුතු නොකළැයි ශ්‍රී ලංකා මහ බැංකුව ඇතුළු කිහිපදෙනකුට එරෙහිව එම සමාගමේ තැන්පත්කරුවන් පිරිසක් ගොනු කළ අපහාස නඩුවේ දී ඔහු මේ බව දැන්වීය.

අගවිනිසුරු ප‍්‍රියසාත් ඩෙප් සහ විනිසුරු අනිල් ගුණරත්න යන ශ්‍රේෂ්ඨාධිකරණ විනිසුරු මඩුල්ලක් හමුවේ පෙත්සම කැඳවිණි.

ගෝල්ඩන් කී සමාගමේ තැන්පත්කරුවන් වන රොෂාන් හරින්ද්‍ර ප‍්‍රනාන්දු සහ ඉෂානි ශ්‍රීමතී ප‍්‍රනාන්දු විසින් ගොනු කරනු ලැබූ මෙම අපහාස නඩුවේ වගඋත්තරකරුවන් වශයෙන් ශ්‍රී ලංකා මහ බැංකුවේ මුදල් මණ්ඩලය ,මුදල් ඇමති ,මුදල් අමාත්‍යාංශ ලේකම් , මහ බැංකු අධිපති ,මහ බැංකු මුදල් මණ්ඩලයේ සාමාජිකයින් සහ නීතිපති නම් කරනු ලැබ සිටිති.

තැන්පතුකරුවන් 9000ක් පමණ ගෝල්ඩන් කී ක්‍රෙඩිට් කාඩ් සමාගමේ මුදල් තැන්පත් කර තිබූ අතර එම මුදල් හෝ පොළිය ලබා දීමට එම සමාගම කටයුතු කර නොතිබිණි. ඊට එරෙහිව තැන්පතුකරුවන්  මූලික අයිතිවාසිකම් පෙත්සමක් ගොනු කරනු ලැබූ අතර පෙත්සම් විභාගය අතරතුර වගඋත්තරකරුවන් මෙම මුදල් ගෙවීමට කටයුතු කරන බව අධිකරණයට දැනුම් දුන්නේය.

එම මුදල් ආපසු ගෙවීම සඳහා යාන්ත‍්‍රණයක් සකස් කරන බවද අදියර කිහිපයක් යටතේ එම ගෙවීම් සිදු කරන බවද මුදල් ඇමතිවරයා වෙනුවෙන් ඉකුත් 2015 වසරේ මැයි 18 වැනිදා නීතිපති අධිකරණය හමුවේ ප‍්‍රකාශ කර තිබිණි.

පෙත්සම යළි සලකා බැලීම ඔක්තෝබර් 2 වැනිදා තෙක් කල් තැබිණි.