(ගම්පහ තිලකරත්න දිසානායක)

ගම්පහ බණ්ඩාරනායක විද්‍යාලයේ උසස් පෙළ ඉගෙනුම ලබන සිසුවකු විසින්  ගුවන් ගත කළ හැකි  රොකට්ටුව නිපදවා ඇත.

එල්.එච්. ගිහාන් හෙට්ටිආරච්චි සිසුවා විසින් නිර්මාණය කර ඇති කිලෝ මීටර් 20ක දුරකට යැවිය හැකි මෙම රොකට්ටුව ගම්පහ බණ්ඩාරනායක විද්‍යාලයේ සියවස් සැමරුම් උත්සවයට සමගාමීව පැවති ප්‍රදර්ශනයට ඉදිරිපත් කර තිබිණි.

ප්‍රදර්ශනය විවෘත කිරීමට පෙරේදා (13) එහි ගිය ජනාධිපති මෛත්‍රීපාල සිරිසේන මහතාගේ ද ඇගැයීමට එය ලක්විය.

මෙම රොකට්ටුව නිර්මාණය කිරීමට අන්තර්ජාලය ඔස්සේ තාක්ෂණික දැනුම ලබා ගත් බව පැවසූ ගිහාන් සිසුවා මෙය නිර්මාණය කිරීමට මාස දෙකක කාලයක් ගත වූ බවද පැවසීය. 

 පැයට කිලෝ මීටර් 750ක වේගයකින් ගමන් කළ හැකි මෙම රොකට්ටුව උසින් අඩි 20ක් වන අතර බර කිලෝ ග්‍රෑම් 25කි. 

තමන්ගේ මෙම නිර්මාණය පෙරේදා නැරඹූ ජනාධිපති මෛත්‍රීපාල සිරිසේන මහතා මෙය අගය කරමින් සතුට පළ කළ බවත් මෙය වැඩිදියුණු කිරීම පිණිස අවශ්‍ය ප්‍රතිපාදන ලබා දෙන බවත් පවසමින් රොකට්ටුව ගුවන්ගත කරන අවස්ථාවට සහභාගි වන බව පැවසූ බව ද ගිහාන් සිසුවා පැවසීය. 

තමන්ට මෙම රොකට්ටුව නිෂ්පාදනය කිරීමට රුපියල් 50,000ක පමණ මුදලක් වැයවූ බව පැවසූ ගිහාන් මෙය ගුවන්ගත කිරීමට අවශ්‍ය රසායනික ද්‍රව්‍ය දෙක යොදා කිලෝ මීටර් 20ක දුරක් යැවීමට රුපියල් ලක්ෂ නවයක පමණ මුදලක් වැයවන බව ද කීය. 

මෙය නිර්මාණය කිරීමේ දී බණ්ඩාරනායක විද්‍යාලයේ ජෛව පද්ධති තාක්ෂණ විෂය භාර ආචාර්ය රවීන්ද්‍ර දිවුල්වැව මහතාගේ මගපෙන්වීම ලැබුණු බව පැවසූ ගිහාන් හෙට්ටිආරච්චි සිසුවා; තමන්ට මෙම තාක්ෂණය වැඩිදියුණු කිරීමට සහය ලැබෙන්නේ නම් ශ්‍රී ලංකාවේ නම ඉහළ තැනකට ගෙන යාහැකි බව ද කියා සිටියේය. 

මෙම රොකට්ටුව ගුවන්ගත කිරීමට ශ්‍රී ලංකා ගුවන් හමුදාවෙහි අවසරය ලබා ගැනීමෙන් පසුව ලබන මස දී කල්පිටිය ගුවන් හමුදා කඳවුරේ දී ගුවන්ගත කරන බවත් මෙම අවස්ථාවට ජනාධිපති මෛත්‍රීපාල සිරිසේන මහතාට ඉතා ගෞරවයෙන් යුතුව ආරාධනය කිරීමට අදහස් කර සිටින බවත් ඔහු සඳහන් කළේය.