ඉන්දියාවේ කුෂිනගර් (කුසිනාරා) ගුවන්තොටුපළ ජාත්‍යන්තර ගුවන්තොටුපළක් ලෙස ප්‍රකාශයට පත් කරනු ලැබ තිබේ.  ඉන්දීය අග්‍රාමාත්‍ය නරේන්ද්‍ර මෝදි මහතාගේ සභාපතිත්වයෙන් යුත් ඉන්දියානු මධ්‍යම කැබිනට් මණ්ඩලය විසින් උත්තර් ප්‍රදේශ් හි කුෂිනගර් ගුවන්තොටුපළ ජාත්‍යන්තර ගුවන් තොටුපලක් ලෙස ප්‍රකාශයට පත් කිරීමට අනුමැතිය ලබා දී තිබේ.

බුදුරජාණන් වහන්සේගේ ප්‍රධාන පූජනීය ස්ථාන හතරෙන් එකක් ලෙස සැලකෙන කුසිනාරාව, බුදුරජාණන් වහන්සේ ‘පරිනිර්වානය’ කළ ස්ථානය ලෙස විශ්වාස කෙරේ.

පස්වැනි සියවසේ සිට කුසිනාරාවේ මහපරිණිර්වානා විහාරස්ථානයේ  පවතින බුදුන් වහන්සේගේ අතිවිශාල පිළිමයක් මේ සඳහා සාක්ෂි දරයි.  රාමබාර් ස්ථූපය හෙවත් මූලගන්ධ කුටි විහාරස්ථානය බුදුරජාණන් වහන්සේගේ ශ්‍රී දේහය ආදාහනය කරන ලද ස්ථානය ලෙස හැඳින්වේ.  මූලගන්ධ කුටි විහාරස්ථානය පිහිටා ඇත්තේ මහපරිණිර්වානා විහාරස්ථානය අසල ය.

කුෂිනගර් දිස්ත්‍රික්කයේ තවත් ආරාම හා බෞද්ධ සංස්කෘතික ස්ථාන රාශියක් ඇත. කුෂිනගර් ගුවන්තොටුපළ ජාත්‍යන්තර ගුවන්තොටුපළක් ලෙස ප්‍රකාශයට පත්කිරීමෙන් බෞද්ධ බැතිමතුන්ට, ඉතිහාසඥයින්ට මෙන්ම සංස්කෘතික කටයුතු පිළිබඳ උනන්දුවක් දක්වන්නන්ට  කුෂිනගර් පමණක් නොව, ඓතිහාසිකව වැදගත් ස්ථාන වන ලුම්බිනි, කපිලවස්තු සහ ශ්‍රාවස්ති වැනි ස්ථාන ද ගවේෂණය කිරීමට අවස්ථාව සැලසේ.