(කේ.පී. සුමනදාස)
 
උඩවලව ජාතික වනෝද්‍යානයේ දඩයමේ ගිය පුද්ගලයකුට අද (21) වනජීවී නිලධාරීන් වෙඩිතබා ඇත.
 
වෙඩි වැදී ඇත්තේ සෙවනගල සම්පත් ගම පදිංචි 25 හැවිරිදි තරණයකු වන විජමුණිගේ කසුන් චාමර නැමති අයකුටය. ඔහු මේ වන විට ඇඹිලිපිටිය රෝහලේ ප්‍රතිකාර ලබමින් සිටී.
 
මේ පිළිබදව උඩවලව ජාතික වනෝද්‍යානයේ උද්‍යාන භාරකරු වන රණතුංග මහතාගෙන් විමසීමකදි කියා සිටියේ වනෝද්‍යානයේ 5 කණුව බීට්ටු කාර්යාලයේ නිලධාරීන් අද වනෝද්‍යානය තුල සංචාරය කරන අතරතුර දඩයමේ ගිය අයකු දැක නවතින ලෙස අණ කිරීමේදී එයට අවනත නොවීම හේතුවෙන් රබර් උණ්ඩ යොදා වෙඩි තබා ඇති බවය.
 
වෙඩි වැදුණු අයගේ සහෝදරයකු පවසා සිටියේ තම සහෝදරයා ගවයන් බැලීම සදහා වනෝද්‍යානයට ගිය විට වනජීවී නිලධාරීන් ඔහුට වෙඩි තබා ඇති බවය. දඩයමේ ගියේ නම් ඔහු සතුව ගිනි අවියක් තිබිය යුතු බවත් ඔහු අතේ තිබුණේ ගවයන් දැක්කීමට ගන්නා කෙවිට පමණක් බවත්ය යනුවෙනි.