(දසුන් රාජපක්ෂ)

කුමන දේවස්ථානයටදැයි නිශ්චිතව සඳහන් නොවුවද, ලංකාවේ දේවස්ථාන මුල්කරගෙන පුද්ගලයන් 6දෙනෙකු මරාගෙන මැරෙන බෝම්බ ප්‍රහාරයක් එල්ල කළ හැකි බව පාස්කු ඉරු දින බෝම්බ ප්‍රහාර මාලාවට පෙර ඉන්දීය බුද්ධි අංශ මගින් මෙරට ජාතික බුද්ධි සේවාවට දැනුම් දුන් බව විශේෂ කාර්ය බලකායේ අණ දෙන නිලධාරීන් නියෝජ්‍ය පොලිස්පති වරුණ ජයසුන්දර මහතා පාස්කු ඉරුදින බෝම්බ ප්‍රහාර මාලාව පිළිබඳව විමර්ශනය කරන ජනාධිපති කොමිසම හමුවේ සාක්ෂි ලබාදෙමින් අද(02) ප්‍රකාශ කළේය.

තමා වෙත ලැබුණු එම බුද්ධි තොරතුර ඇතුළත් ලිපිය ත්‍රස්ථ විමර්ශන කොට්ඨාසයේ ස්ථානාධිපතිවරයාට හා සහකාර පොලිස් අධිකාරීවරයකු වෙත පෙන්වා ප්‍රහාරයක් එල්ල විය හැකි බව ඔවුන් වෙත දන්වා සිටිය බවද, නියෝජ්‍ය පොලිස්පති වරුණ ජයසුන්දර මහතා සඳහන් කළේය.

අද(02) පෙරවරුවේ මෙම ජනාධිපති කොමිසම හමුවේ සාක්ෂි දුන් හිටපු අභියාචනාධිකරණ විනිසුරු එම්.එම්.ඒ.ගපූර් මහතා සහරාන් විසින් මුස්ලිම් ආගම හා කුරානය ඔහුගේ දේශන හරහා විකෘති කරනු ලැබ ඇතැයි කියාසිටියේය.

එමෙන්ම 2012 වර්ෂයේ එක්තරා දිනක නුවරඑළියේදී විදේශීය කණ්ඩායමක් බුදුදහම විකෘති කළ පත්‍රිකා බෙදීමේ සිද්ධියක් ගැන ජනාධිපති කොමිසම දැනුවත් කළ ගපූර් මහතා අපරාධ පරීක්ෂණ දෙපාර්තමේන්තුවට ඒ බව දැනුම් දී ඒ පිරිස අත්අඩංගුවට ගැනීමට කටයුතු කළ බවද, සාක්ෂි දෙමින් දන්වා සිටියේය.

කාර්මික සංවර්ධන මණ්ඩලයේ අලෙවි අධ්‍යක්ෂ සරත් උදයසිරි මහතා දෙවැනි දිනයටත් මෙම ජනාධිපති කොමිසම හමුවේ අද(02) පස්වරුවේ සාක්ෂි ලබාදුන්නේය.

මෙම ජනාධිපති කොමිසම අභියාචනාධිකරණ විනිසුරු ජනක් ද සිල්වා මහතාගේ ප්‍රධානත්වයෙන් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ ස්ථාපිත කොට තිබෙන විශේෂ කාර්යාලයේදී අද(02) රුස්විය.

පාස්කු ඉරු දින බෝම්බ ප්‍රහාර මාලාව පිළිබඳ විමර්ශනය කරන ජනාධිපති කොමිසම හෙට(03) යළි රැස්වීමට නියමිතය.