(පාලිත ආරියවංශ)

හිටපු ආණ්ඩුකාරවරයෙකු වූ ජනාධිපති නීතිඥ මාෂල් පෙරේරා මහතාගේ අවසන් කටයුතු ලබන 3 වැනිදා  පස්වරු 4.00 ට බදුල්ල පොදු සුසාන භූමියේදී සිදුකිරීමට නියමිතය.

නීතිඥ මාෂල් පෙරේරා මහතා ඊයේ (30) වැනිදා කොළඹ පෞද්ගලික රෝහලකදී අභාවප්‍රාප්ත විය.

දේහය අද පෙරවරු 9.00 සිට පස්වරු 6.00 දක්වා කොළඹ ජයරත්න මල් ශාලාවේ තැන්පත් කර තිබෙන අතර හෙට (01) වැනිදා පස්වරු 1.00 ට  දේහය කොළඹ සිට බදුල්ල බණ්ඩාරනායක මාවතේ පිහිටි ඒ මහතාගේ නිවසට රැගෙන ඒමට නියමිතය.

ජුනි මස 3 වැනිදා තෙක් මහජන ගෞරවය සඳහා ඒ මහතාගේ නිවසේ තැන්පත් කරන දේහය  3 වැනිදා  පස්වරු 3.00 ට නිවසේ සිට බදුල්ල අධිකරණ සංකීර්ණය වෙත රැගෙන ගොස් එහිදී  විනාඩි 30 ක පමණ  කාලයක්  තැන්පත් කර විනිසුරුවන්ගේ , නීතිවේදීන්ගේ හා අධිකරණ කාර්ය මණ්ඩලවල අවසන් ගෞරව දැක්වීම සඳහා අවස්ථාව සැලසීමට අවමංගල්‍ය උත්සව කමිටුව තීරණය කර තිබේ.

පසුය දේහය  බදුල්ල පොදු සුසාන භූමිය වෙත රැගෙන ගොස් එහිදී අවසන් කටයුතු සිදුකිරීමට නියමිතය.

මාෂල් පෙරේරා මහතා බදුල්ල දිස්ත්‍රික් පාර්ලිමේන්තු මන්ත්‍රී  ඩිලාන් පෙරේරා මහතාගේ සහ ක්‍රිෂේලි පෙරේරා මහත්මියගේ පියාණන් වන අතර විශ්‍රාමලත් පාඨශාලාචාරිනි දයා පෙරේරා මහත්මියගේ ස්වාමිපුරුෂයාය.

1955 දි නීතිවේදියෙකු වූ මාෂල් පෙරේරා මහතා ලංකා සම සමාජ පක්ෂයේ  ප්‍රබලයෙක් ද විය.

ජනතා විමුක්ති පෙරමුණේ නායකයා වූ රෝහණ විජේවීර මහතා ට එරෙහිව නුවරඑළිය අධිකරණයේ විභාග වු නඩුවලට  පෙනී සිට ඇති අතර 1971 ද කැරලි කරුවන්ට සහාය දැක්වීමේ චෝදනාව යටතේ සිර ගත කිරීමකටද ලක්ව තිබේ.

2003 දී ජනාධිපති නීතිඥවරයෙකු ලෙස දිවුරුම් දුන් මාෂල් පෙරේරා මහතා  සබරගමුව, දකුණ හා ඌව පළාත්වල ආණ්ඩුකාරවරයා ලෙසද කටයුතු කළේය.