(හේවාහැට එම්. දසනායක)

වසර දොළහක පමණ කාලයක් අඳේට බලාගත් මී දෙන අයිතිකරුට හොරෙන් මසට විකුණා සර්පයකු දෂ්ඨ කිරීමෙන් එම සතා මිය ගිය බවත්, ඉන්පසු වළ දැමූ බවත් පැවසූ පුද්ගලයකුට වළ දැමූ ස්ථානය පෙන්වන්න යැයි කී විට එම ස්ථානය අමතක යැයි කී සිදුවීමක් පිළිබඳව උඩරට ගොවි ගම්මානයකින් වාර්තා විය.

සිද්ධිය සැකෙවින් මෙසේය.

මී දෙනගේ අයිතිකරු විශ‍්‍රාමිකයෙකි. ඔහු මිට වසර දොළහකට පමණ පෙර තමාට අයිති මී දෙන අඳේට සතුන් රැක බලා ගන්නා පුද්ගලයකුට ලබාදී ඇත.

කාලය මෙසේ ගෙවී යද්දී මී දෙන බලාගත් පුද්ගලයා හදිසියේම අයිතිකරු හමුවට පැමිණ සර්පයකු දෂ්ඨ කිරීමෙන් මී දෙන මියගිය බවත්, ඉන්පසු වළ දැමූ බවත් පවසා ඇත.

ගවයා බලා ගත් පුද්ගලයාගේ හැසිරීම පිළිබඳව සැක සිතූ අයිතිකරු තොරතුරු සොයා බලා මී දෙන බලාගත් පුද්ගලයාගේ නිවසට ගොස් මියගිය සතා වළ දැමූ ස්ථානය බැලීමට අවශ්‍ය බව පවසා ඇත. මේ අවස්ථාවේ තමා නැගිට ගැනීමට නොහැකි තත්ත්වයෙන් පසුවන බවත්, මියගිය සතා වළ දැමූ ස්ථානය දැන් තමන්ට අමතක බවත් මේ වන විට මී දෙන බලාගත් පුද්ගලයා පවසා ඇත.

පසුව දෙදෙනා අතර බහිස්බස්වීමක් ද සිදුවී ඇති අතර, සිදුවී ඇති සියලූ දේ තමන් දන්නා බවත් සත්‍ය පවසන ලෙසත් මී දෙනගේ අයිතිකරු මෙවිට පවසා ඇත.

මී දෙන රුපියල් හතළිස් දහසක මුදලකට මසට විකිණූ බවට මෙම අවස්ථාවේ පිළිගෙන ඇති අඳේට සතා බලා ගත් පුද්ගලයා මී දෙන මිලදීගත් ව්‍යාපාරිකයා තමන්ට හරිහැටි මතක නැතැයි ද පවසා ඇත.

අමතක වෙන රෝගය උඹටත් වැළඳිලා පොලිසියේදී හොඳට මතක් වෙයි’’ යනුවෙන් පවසා මී දෙනගේ හිමිකරු මේ පිළිබඳව පැමිණිලි කොට ඇත.