(හර්ෂණ තුෂාර සිල්වා)

කොරෝනා වයිරසය හේතුවෙන් ඇති වී තිබෙන ගෝලීය තත්ත්වය ශ්‍රී ලංකාවට අහිතකර බලපෑම් එල්ල කළත් මේ වසරේදී මෙරට ආර්ථික වර්ධනය පසුගිය වසරට වඩා හොඳවනු ඇතැයි ශ්‍රී ලංකා මහ බැංකුවේ අධිපති දේශමාන්‍ය මහාචාර්ය ඩබ්ලිව්.ඩී. ලක්ෂ්මන් මහතා අද (5) ප්‍රකාශ කළේය.

මේ වසරේදී ශ්‍රී ලංකාවේ ආර්ථිකය සියයට 3.5ත් 4ත් අතර අගයකින් වර්ධනය වනු ඇතැයි ද හෙතෙම පැවැසීය.

මේ වසරේ දෙවැනි මුදල් ප්‍රතිපත්ති විවරණය ප්‍රකාශයට පත් කරමින් ශ්‍රී ලංකා මහ බැංකුවේ අධිපති දේශමාන්‍ය මහාචාර්ය ඩබ්ලිව්.ඩී. ලක්ෂ්මන් මහතා එම කරුණු සඳහන් කළේය.

එහිදි තවදුරටත් අදහස් දැක්වූ ශ්‍රී ලංකා මහ බැංකුවේ අධිපති මහාචාර්ය ඩබ්ලිව්.ඩී. ලක්ෂ්මන් මහතා මෙසේ ද කීය.

     ‘‘ඊයේ රැස්වූ මුදල් මණ්ඩලය දැනට තිබෙන ලිහිල් මුදල් ප්‍රතිපත්ති ස්ථාවරය අඛණ්ඩව පවත්වාගෙන යෑමට තීරණය කළා. අපි ප්‍රතිපත්ති පොළී අනුපාත පදනම් අංක 50කින් අඩු කළ අතර අපි අඩු කළ අගයේම පවත්වාගෙන යනවා. අපි ජනවාරි මාසයේදී ප්‍රතිපත්ති පොළී අනුපාත අඩු කළා. එම අඩුවීමේ වාසිය කිසිදු ප්‍රමාදයකින් තොරව ණයගන්නන්ට ලබාදෙන්නැයි අපි වාණිජ බැංකුවලට අවධාරණය කරනවා.

විශේෂයෙන් කොරෝනා වයිරසයේ ව්‍යාප්තියත් සමඟ ඇතිවන ගෝලීය තත්ත්ව නිසා සිදුවන බලපෑම්වලින් ආරක්ෂා කරගැනීම සඳහා දේශීය මූල්‍ය වෙළෙඳපොළවල ද්‍රවශීලතාව පවත්වාගෙන යන බව අපි වෙළෙඳපොළවලට සහතික වෙනවා.

ලොව ප්‍රධාන පෙළේ ආර්ථික සහ ප්‍රතිපත්ති සම්පාදකයන් නව කොරෝනා වයිරසය සම්බන්ධයෙන් ගන්නා ක්‍රියාමාර්ග මොනවාදැයි සහ ඒවාට දක්වන ප්‍රතිචාර මොනවාදැයි අපි සමීපව නිරීක්ෂණය කරනවා.

ලොව ප්‍රධාන පෙළේ ආර්ථික රැසක් මේ වනවිට ලිහිල් ප්‍රතිපත්ති අනුගමනය කරනවා. ගෝලීය ආර්ථිකය දැනට පවතින දුර්වල තත්ත්වයෙන් යථා තත්ත්වයට පත්වන බවට සංඥා පෙන්වන තුරු දැනට ගෙන ඇති ලිහිල් ක්‍රියාමාර්ග ඉදිරියටත් පවතීවි.

ගෝලීයව දැනට ඇති වී තිබෙන තත්ත්වය ශ්‍රී ලංකාවටත් අහිතකර බලපෑම් එල්ල කරාවි.

පසුගිය වසරට වඩා මේ වසරේදී ශ්‍රී ලංකාවේ ආර්ථිකය ඉතා හොඳින් ක්‍රියාත්මක වනු ඇතැයි අපි බලාපොරොත්තු වෙනවා. මේ වසරේදී ආර්ථිකය සියයට 3.5ත් 4ත් අතර වේගයකින් වර්ධනය වනු ඇතැයි ද අපි අපේක්ෂා කරනවා.

මහ මැතිවරණය අප්‍රේල් මස 25 වැනිදා පැවැත්වෙනවා. මැයි මාසයේදී නව පාර්ලිමේන්තුව කැඳවීමත් අයවැය ප්‍රකාශයට පත් කිරීමත් සමඟ ආයෝජකයන්ගේ විශ්වාසය තවදුරටත් ඉහළ යනු ඇතැයි ද අපි අපේක්ෂා කරනවා.

පසුගිය කාලයේදී උද්ධමනය ඉහළ යෑම සම්බන්ධයෙන් අදහස් දැක්විය යුතුයි. මතුපිට උද්ධමනය අපි අපේක්ෂා කළ අගයට වඩා ඉහළ අගයක් ගත්තා. ආහාර උද්ධමනය ඉහළ යෑම ඊට ප්‍රධාන වශයෙන් හේතුවුණා. ආහාර මිල ගණන් පහත යෑම ආරම්භ වී තිබෙනවා. ඒ නිසා කෙටි කාලයකින් උද්ධමනය සියයට 4ත් 6ත් අතර ඉලක්ක ගත අගයට පැමිණ ස්ථාවර වනු ඇතැයි අපි අපේක්ෂා කරනවා.

පසුගිය කාලයේදී විනිමය අනුපාත ද ස්ථාවර වී තිබෙනවා’’.

ශ්‍රී ලංකා මහ බැංකුවේ ජ්‍යෙෂ්ඨ නියෝජ්‍ය අධිපති ආචාර්ය නන්දලාල් වීරසිංහ, නියෝජ්‍ය අධිපති එච්.ඒ. කරුණාරත්න, සහකාර අධිපති අශෝක හඳගම, ආර්ථික පර්යේෂණ දෙපාර්තමේන්තුවේ අධ්‍යක්ෂ ආචාර්ය සී. අමරසේකර ඇතුළු නිලධාරීහු පිරිසක් ද මෙම මාධ්‍ය හමුවට එක්ව සිටියහ.