මිනිස් සිතුවිලි වල ස්වභාවය බාහිර පරිසරය කෙරෙහි බලපෑමක් ඇති කරන්නේදැයි සෙවීමට ජපන් ජාතික පර්යේෂකයෙක් අපූරු පර්යේෂණයක් සිදුකර තිබේ.

සහල් පිරවූ බදුන් 2ක් ගෙන ඇති ඔහු ‘‘ස්තූතියි,මම ඔබට ආදරෙයි‘‘ යැයි සදහන් කොළයක් එක් බදුනක පිටතින්ද,‘‘මම ඔබට වෛර කරනවා,මෝඩයෝ‘‘ යැයි සදහන් කොළයක් අනෙක් බදුනේ පිටතින්ද අලවා එම බදුන් 2 පාසැලක කොරිඩෝවක තබා ඇත.

අනතුරුව ඔහු පාසලේ සිසුන්ගෙන් ඉල්ලා ඇත්තේ බදුන් 2 පසුකර යන සෑම වතාවකම එම බදුන් වල අලවා ඇති කොළයන්ගේ සදහන් වන වැකි බදුන් දෙස බලාගෙන හඩ නගා පවසන ලෙසයි.

දින 30 කට බදුන් විවෘත කර පරීක්ෂා කර බැලූ විට යහපත් සිතුවිලි සදහන් වූ බදුනේ සහල් කිසිදු වෙනසක් නොවී පවතිනුත් වෛරී සිතුවිලි සදහන් වූ බදුනේ සහල් නරක් වී තිබෙනු හදුනාගැනීමට හැකිවී ඇතැයි සදහන්ය.

පර්යේෂක ආචාර්ය මසාරු එමොටෝ මිනිස් සිතුවිලි භෞතික ලෝකය කෙරේ බලපෑම් එල්ල කරන්නේයැයි විශ්වාස කරන්නෙකි.ඔහු සිදුකරන මේ පර්යේෂණයන්ගෙන් පෙනී යන්නේ එවැන්නක් සැබෑවටම සිදුවන බවකි.

මිට පෙර වතාවකදී ඔහු ජලය යොදාගෙන මෙවැනිම පර්යේෂණයක් සිදුකළේය.එහිදී ඔහු කළේ ජල බදුනක් කුටීරයක තබා එදෙස බලාගෙන යහපත් සිතුවිලි වඩන්න යැයි පර්යේෂණයට සහභාගී වූ පුද්ගලයින්ට උපදෙස් දීමය.මේ සදහා පුද්ගලයින් 2000 ක් පමණ සහභාගී කරවාගෙන තිබුණි.

අනතුරුව ජලයේ අණු සැකැස්ම අනුදක්නයක් ආධාරයෙන් පරීක්ෂා කළ විට හදුනාගත හැකිව තිබෙනුයේ සාමාන්‍යයෙන් පිහිටනවාට වඩා වෙනස් ලෙස විචිත‍්‍ර රටා මවමින් ජල අණු පිහිටා තිබෙනුය.

‘‘මම මේ සම්බන්ධයෙන් ලොවට හෙළි කරපුවහම බොහෝ දෙනා සිතුවේ මා බොරුකාරයෙක් කියලා.ජල අණු සැකැස්මවල් පෙන්වන ඡායාරූපයන් ව්‍යාජ ලෙස සකස් කර ඇතැයි කියලා ඔවුන් චෝදනා කළා.ඇත්ත මේ සංසිද්ධීන් පැහැදිලි කරන්න විදිහක් නැහැ.දැකලම තමයි බලාගන්න  ඕන.‘‘ යැයි ආචාර්ය එමොටෝ පවසන්නේය.

විද්‍යාත්මක පදනමක් නැතත් ආචාර්ය මසාරු එමොටෝගේ පර්යේෂණයන් නොසළකා හැරිය නොහැක්කේ ඒවායින් ලැබී ඇති ප‍්‍රතිඵල දකින විටදීය.ඇතැම් විට සැබෑවටම අපගේ සිතුවිලි බාහිර ලෝකයේ පැවැත්ම හා කටයුතු කෙරෙහි බලපෑම් එල්ල කරනවා විය හැක.