මානුෂීය ආධාර තොගයක් රැගෙන ඉකුත් වසරේ ගාසා තීරයට ගිය නෞකාවට ඊශ‍්‍රායල හමුදා සෙබළුන් එල්ල කළ ප‍්‍රහාරයෙන් තුර්කි ජාතිකයන් සිවු දෙනකු මියයෑමේ සිද්ධිය සම්බන්ධයෙන් එක්සත් ජාතීන්ගේ පරීක්ෂණ වාර්තාව පෙරේදා (3) එළිදැක්වීමත් සමඟ තම රටේ සිටින ඊශ‍්‍රායල තානාපති නෙරපා දැමීමට තුර්කි රජය පියවර ගත්තේය. තුර්කි විදේශ ඇමැති අමෙත් ඩොටොග්ලූ මාධ්‍ය හමුවක් පවත්වමින් කියා සිටියේ තුර්කියේ සිටින ඊශ‍්‍රායල තානාපති ඇතුළු කාර්ය මණ්ඩලය වහාම සිය රට බලා පිටත් කළ බවය. විදේශ ඇමැතිවරයා වැඩි දුරටත් කියා සිටියේ එම සිද්ධිය සම්බන්ධයෙන් මේ වන තෙක්ම ඊශ‍්‍රායල රජය තුර්කියෙන් කිසිදු ආකාරයේ සමාව ඇයැදීමක් සිදුකර නැති බවය. තුර්කිය සහ ඊශ‍්‍රායලය අතර පැවැති සියලූම හමුදා ගනුදෙනු ද වහාම අත්හිටුවීමට ද තුර්කි රජය තීරණය කර ඇතැයි ඇමැති අමෙත් ඩොටොග්ලූ මාධ්‍යවේදීන් හමුවේ කියා සිටියේය. ඊශ‍්‍රායලයේ සිටි තුර්කි තානාපතිවරයා නිවාඩුවක් සඳහා මේ දිනවල සිය රටට එනම් තුර්කියට පැමිණ සිටින බවත් ඔහු ආපහු ඊශ‍්‍රායලට නොයවන බවත් ඇමැති අමෙත් ඩොටොග්ලූ පවසයි.

අන්කාරා (රොයිටර්)