2023 මාර්තු මස 21 වන අඟහරුවාදා
‘‘කොංග්‍රසයට දැඩි වෙහෙසක් ගැනීමට සිදුවෙයි‘‘ - ප්‍රියංකා ගාන්ධි වද්‍රා
කොංග්‍රස් පක්ෂයට ඉදිරියේදී දැඩි වෙහෙසක් ගැනීමට සිදුවන බවත් පක්ෂය එය කරන බවත් එම පක්ෂයේ මහලේකම් ප්‍රියංකා ගාන්ධි වද්‍රා පැවැසුවාය.
දිල්ලි ප්‍රාන්ත මැතිවරණයේ ඡන්ද ප්‍රතිඵල නිකුත් වීමෙන් පසුව ප්‍රියංකා ගාන්ධි වද්‍රා ඒ බව කීවාය.
දිල්ලි ප්‍රාන්ත මැතිවරණයේ ප්‍රතිඵල සම්බන්ධයෙන් වරණාසී ගුවන් තොටුපොළ ආසන්නයේදී මාධ්‍යවේදීන් කළ විමසීමකට පිළිතුරු දෙමින් ඇය ඒ බව දඳහන් කළාය.
දිල්ලි ප්‍රාන්ත මැතිවරණයේ ප්‍රතිඵල අඟහරුවාදා නිකුත් කෙරුණි.
භාරතීය ජනතා පක්ෂය ගෙනා පුරවැසිභාවය සංශෝධනය කිරීමේ පනත් කෙටුම්පතට එරෙහිව වරණාසීවලද විරෝධතා පැවැත්වෙයි. ප්‍රියංකා ගාන්ධි එම විරෝධතාකරුවන් මුණ ගැසීමට වරණාසී වෙත පැමිණියාය. ඔවුන් මුණ ගැසීමෙන් අනතුරුව ඇය නැවත දිල්ලි බලා ගමන් කිරීමට නියමිතය.
“මහජනතාව කරන්නේ මොකක් වුණත් හරි. එහෙත් මේ වෙලාවේ අපිට අරගල කරන්න වෙලා තියෙනවා.වෙහෙසෙන්න වෙලා තියෙනවා. අපි ඒ දේ කරනවා” යැයි ප්‍රියංකා ගාන්ධි වාර්තාකරුවන්ට කීවාය.
ඉන්දියාවේ නවදිල්ලි අගනුවරට අයත් දිල්ලියේ ප්‍රාන්ත මැතිවරණය පසුගියදා (8) පැවැත්විණි. දිල්ලි ප්‍රාන්ත සභාව ආසන 70කින් සමන්විතය. එම ආසන 70න් 63කම ඇප මුදල් ආරක්ෂා ගැනීමට කොංග්‍රස් පක්ෂය අසමත් විය. ආසන 70න් එකදු ආසනයක් හෝ දිනාගැනීමට කොංග්‍රස් පක්ෂයට නොහැකි විය. ප්‍රාන්ත මැතිවරණයකදී එකදු ආසනයක් හෝ දිනාගැනීමට කොංග්‍රස් පක්ෂය අඛණ්ඩව අසමත් වූ දෙවැනි අවස්ථාව මෙය විය.
එන්.ඩී.ටීවි
055
