ඇමෙරිකානු රජය නීතිවිරෝධීව කටයුතු කළ බවට චෝදනා කරමින් හුවාවි සමාගම පනවා තිබෙන නඩුව ඉවත් කරන්නැයි ඉල්ලමින් ඇමෙරිකානු රජය එරට දිස්ත්‍රික් අධිකරණයකට මෝසමක් ඉදිරිපත් කර ඇත. 

හුවාවි සමාගමේ නිෂ්පාදන අසාදු ලේඛන ගත කළ අවස්ථාවේදී ඇමෙරිකා එක්සත් ජනපද රජය නීතිවිරෝධීව කටයුතු කළැයි චෝදනා කරමින් චීනයේ හුවාවි සමාගම එම නඩුව ගොනු කළේය.

හුවාවි සමාගම පසුගිය මාර්තු මාසයේ දී ඇමෙරිකානු රජයට එරෙහිව මෙම නඩුව පැනවීය. ඇමෙරිකාව තුළ හුවාවි සමාගම ව්‍යාපාර කටයුතු සීමා කිරීමට එරට රජය ගත් ක්‍රියාමාර්ග ව්‍යවස්ථා විරෝධී යැයි පවසමින් හුවාවි සමාගම එම නඩුව පැනවීය.

හුවාවි සමාගම ඇමෙරිකා එක්සත් ජනපදය සහ චීනය අතර මේ වනවිට පවතින වෙළඳ යුද්ධයේ කොටසක් වන අතර මෙම වෙළෙඳ යුද්ධය නිසා ලොව පුරා මූල්‍ය වෙළෙඳපොළ අර්බුදකාරී තත්ත්වයකට පත්ව ඇත.

කෙසේ නමුත් ජපානයේ පැවැති ජී-20 සමුළුව අතරවාරයේ දී ඇමෙරිකානු ජනාධිපති ඩොනල්ඩ් ට්‍රම්ප් සහ චීන ජනාධිපති ෂී ජින්පින්ග් මුණ ගැසුණු අතර හුවාවි සමාගමට පනවා තිබෙන සීමා ලිහිල් කිරීමට එහිදි ඇමෙරිකානු ජනාධිපතිවරයා එකඟතාව පළ කළේය. 

ට්‍රම්ප් පරිපාලනයට සම්බන්ධ නිලධාරීන්ට අනුව ලබන සතියේ දී දෙරටේ නියෝජිතයන් අතර වෙළඳ සාකච්ඡා ආරම්භ කිරීමට සූදානම් බව ද වාර්තා වේ. හුවාවි සමාගම තවදුරටත් අසාදු ලේඛන ගත කර ඇති බැවින් එම සමාගමට අවශ්‍ය ආනයන නිෂ්පාදන සඳහා ඇමෙරිකානු සමාගම් වලින් කෙරෙන බලපත්‍ර ඉල්ලීම් තවදුරටත් “ඉහළම ජාතික ආරක්ෂාව” යන කරුණු සළකා බලමින් දැඩි සුපරීක්ෂාවට ලක් කරන බව ඇමෙරිකානු රජය පෙරේදා (3) සඳහන් කළේය.

ඇමෙරිකානු රජය ඉහත කී මෝසම ඉදිරිපත් කර ඇත්තේ නැගෙනහිර ටෙක්සාස් දිස්ත්‍රික්කයේ දිස්ත්‍රික් අධිකරණයකටය. මුල් පැමිණිල්ල ගොනු කරන ලද්දේ ද මෙම අධිකරණයටය. 

රොයිටර් ඇසුරිනි 

055