බලයෙන් ඉවත් වීම ප‍්‍රතික්ෂේප කරන සිරියා ජනපති බෂීර් අල් අසාද්ගේ රජය, ‘සේරීන්’ විස වායුව ඇතුළත් රසායනික අවි යොදා ගනිමින් එරට සිවිල් වැසියන්ට ප‍්‍රහාරයක් එල්ල කිරීමට  සැරසෙන බවත්, සිරියා රජය එසේ කිරීමෙන් වැළැකිය යුතු බවත් ඇමෙරිකා ජනපති බැරැුක් ඔබාමා අනතුරු අඟවයි. ජනපති ඔබාමා එම අනතුරු ඇඟවීම කළේ වොෂින්ටනයේ පිහිටි ජාතික ආරක්ෂක සරසවියේ පැවැති දේශනයකදීය. එම දේශනයට පාදක වූයේ ජීව සංහාරක අවි ලොවට තර්ජනයක් වී ඇති අයුරු සම්බන්ධයෙනි. සිරියා රජය පවසන්නේ ඔවුන් කිසිම අවස්ථාවක රසායනික අවි යොදා ගනිමින් හෝ සාමාන්‍ය අවි යොදා ගනිමින් හෝ සිවිල් වැසියන්ට පහර නොදෙන බවය. සිරියා රජය පෙරැළීමට උත්සහ ගන්නා කැරැලිකරුවන් ‘ත‍්‍රස්තවාදීන්’ යැයි සිරියා රජය පවසති. ජනපති ඔබාමා කළ එම අනතුරු ඇඟවීමට ප‍්‍රතිචාර දක්වමින් සිරියා රජය කියා සිටියේ තමන් සතුව රසායනික අවි තිබුණත් නැතත් ඒ ගැන ඇමෙරිකාව කනස්සල්ලට පත් නොවිය යුතුයි කියාය. සිරියානු රජයේ කි‍්‍රයා කලාපය ගැන ලෝකයා විමසිල්ලෙන් සිටින බවත් ඔවුන් යම් හෙයකින් රසායනික අවි යොදා ගනිමින් ප‍්‍රහාර එල්ල කරන බවට සාක්ෂි ලැබුණොත් ඊට මැදිහත් වන බව ජනපති ඔබාමා වැඩි දුරටත් කියා සිටී. ඇමෙරිකාව හමුදා යොදවා ආක‍්‍රමණය කරමින් ඉරාකයේ සදාම් හුසේන්ගේ පාලනය පෙරළා දැමුවේ ද මේ අයුරින්ම රසායනික අවි තිබෙන බවට චෝදනා කරමිනි. කෙසේ නමුත් අවසානයේදී එවැනි රසායනික අවි කිසිවක් හමුනොවිණි. සිරියා රජය රසායනික අවි භාවිත කරන බව අනාවරණය වුවහොත් ඇමෙරිකාවට සහ නේටෝවට, සිරියාවට එරෙහි හමුදාමය මැදිහත් වීමක් කළ හැකි වේ. ලිබියාවේදී කලාක් මෙන් බටහිර සහය ලැබෙන කැරැලිකරුවන්ට සිරියා රජය පෙරළා දැමීමට අවස්ථාවක් උදාවෙයි. සිරියා අර්බුදය සම්බන්ධයෙන් ලෝකයේ බලවත් රටවල් දෙකඩ වී සිටින අතර ඇමෙරිකාව, බි‍්‍රතාන්‍යය, ප‍්‍රංශය ඇතුළු බටහිර රටවල් මෙන්ම නේටෝ සාමාජික රාජ්‍යයක් වන තුර්කිය ද සිරියා කැරැලිකාර කණ්ඩායම්වලට පළ කරයි. රුසියාවත් චීනයත් සහාය දෙන්නේ සිරියා ජනපති බෂීර් අල් අසාද්ගේ රජයටයි.