යුක්රේනයේ ‘සැපොරීෂා’ න්‍යෂ්ටික බලාගාරය, රුසියානු හමුදා යුක්රේන ඉලක්ක වෙත ප්‍රහාර එල්ල කිරීම සඳහා හමුදා කඳවුරක් බවට පත් කරගෙන ඇතැයි යුක්රේනය චෝදනා කරයි.

යුරෝපයේ විශාලතම න්‍යෂ්ටික බලාගාරය ලෙස සැලකෙන ‘සැපොරීෂා’ වෙත ප්‍රහාර එල්ල වීම සම්බන්ධයෙන් යුක්රේනය සහ රුසියාව දෙපාර්ශ්වයට චෝදනා එල්ල කර ගත්තේය.

රුසියාව ‘සැපොරීෂා’ වෙත රොකට් ප්‍රහාර එල්ල කළේ යැයි යුක්රේනය චෝදනා කළ අතර යුක්රේනය රොකට් ප්‍රහාර එල්ල කළේ යැයි රුසියාව චෝදනා කළේය.

රුසියානු සොල්දාදුවන් 500 පමණක් සැපොරීෂා න්‍යෂ්ටික බලාගාරයේ සිටින බවත් රොකට් විදිනයන් එහි ස්ථානගත කර ඇති බවත් යුක්රේනය පැවසුවේය.

සැපොරීෂා න්‍යෂ්ටික බලාගාරයට කුමන හෝ පාර්ශවයක් විසින් ප්‍රහාර එල්ල කිරීම සියදිවි හානි කර ගැනීමකට සමාන බව එක්සත් ජාතීන්ගේ මහ ලේකම් ඇන්ටෝනියෝ ගුටරෙස් ප්‍රකාශ කළේය.

දෙපාර්ශවයේ චෝදනා වල සත්‍ය අසත්‍යතාවය පරික්ෂා කිරීම සඳහා  ජාත්‍යන්තර පරීක්ෂකවරුන්ට සැපොරීෂා න්‍යෂ්ටික බලාගාරයට ප්‍රවේශය ලබා දෙන ලෙස එක්සත් ජාතීන්ගේ මහලේකම් ඇන්ටෝනියෝ ගුටරෙස් ඉල්ලා තිබේ.

(රොයිටර්)