පැළද සිටින්නාගේ සිතැගි හදුනාගෙන ඒවාට ගැලපෙන ගීත වාදනය කිරීමේ සමත් ඉස් බනුවක් ජපාන සමාගමක් විසින් නිපදවා ඇත.

ජපානයේ නියුරෝවෙයාර් නම් සමාගමේ නිශ්පාදනයක් වන මෙය සාමාන්‍ය ඉස් බනුවකට වඩා ප්‍රමාණයෙන් විශාලය.හිස් බනුවේ සිට විහිදෙන අතක් වැනි කොටසක් වන අතර එය පැළද සිටින්නාගේ නළලේ ස්පර්ශ වේ.මේ අතක් වැනි කොටසේ ඇත්තේ මොළයේ තරංග හදුනාගැනීමේ සමත් සංවේදකයන්ය.

සතුට, දුක, භීතිය, මානසික පීඩනය ආදී අවස්ථාවන්හි මොළයේ ජනනය වන තරංගයන් ග්‍රහණය කරගන්නා මේ සංවේදක සංඥා ජනනය කරන අතර ඒවා ඉන් අනතුරුව යැවෙන්නේ විශේෂ මෘදුකාංගයක් ස්ථාපනය කර ඇති ජංගම දුරකථනයක් හෝ අයිපොඩ් වැනි උපකරණයක් කරාය.සංඥා ලබාගන්නා මෘදුකාංගය ඒවා අධ්‍යනය කර අවස්ථාවට අදාළ සිතුවිලි හදුනාගෙන ඒ සිතුවිලි වලට ගැලපෙන ගීතයක් ජංගම දුරකථනයේ හෝ අයිපොඩ් උපකරණයේ ඇති ගීත ගබඩාවෙන් තෝරා වාදනය කිරීමේ සමත්ය.

උදාහරණයක් ලෙස ශෝකයෙන් හා සතුටින් සිටින වේලාවන් දෙකක් ගනිමු.ශෝකයෙන් සිටින වේලාවට මොළයෙන් තරංග ජනනය වන්නේ සතුටින් සිටින වේලාවට හාත්පසින්ම වෙනස් ආකාරයකටය.මේ වෙනස සංවේදක වලින් ලැඛෙන සංඥා ආධාරයෙන් හදුනාගැනීමට පෙරකී මෘදුකාංගය සමත්ය.අනතුරුව ගැලපෙන ගීතයක් තෝරා වාදනය කිරීමේ හැකියාවද ඊට ඇත.

දැනට තෝරාගත් ගීත කිහිපයකට මේ ක්‍රියාවලිය සීමා වුවත් ඉදිරියේදී සියලූ ආරයන් වලට අයත් ගීත වලට ගැලපෙන සේ මේ නිර්මාණය දියුණු කිරීමට නියුරොවෙයාර් සමාගමේ පර්යේෂකයන් බලාපොරොත්තුවෙන් සිටී.