ඉන්දියා පාර්ලිමේන්තුවේ උසස් මන්තී‍්‍ර මණ්ඩලය වන රාජ්‍ය සභාවේ විශේෂ සාමාජිකයෙකු ලෙස පිදුම්ලත් සචින් තෙන්දුල්කාර් නියමිත පරිදි පාර්ලිමේන්තු සභාවාර සදහා සහභාගී නොවන්නේයැයි ඔහුට එම අසුන ප‍්‍රදානය කිරීමට යෝජනා කළ මන්තී‍්‍රවරුම චෝදනා කරති.

කි‍්‍රකට් වෙනුවෙන් කළ මෙහෙය හා ඉන්දියාවේ නම ලෝකය වෙත ගෙනයාමට ඔහු දැක්වූ දායකත්වය අරබයා මෙම ස්වාධීන මන්තී‍්‍ර අසුන සචින්ට ප‍්‍රදානය කෙරුණේ 2012 වසරේදීය.එවක ඔහු කි‍්‍රකට් වලින් විශ‍්‍රාම ගෙන නොතිබුණි.

ඉතා ගෞරවයෙන් මෙම අසුන පිළිගන්නා බව පැවසූ සචින් සමග ඡායාරූප ගැනීමට පාර්ලිමේන්තු මන්තී‍්‍රවරු එදා පොර කෑහ.

අද ඔවුන් සචින් පාර්ලිමෙන්තු සභාවාර සදහා සහභාගී නොවන්නේයැයිද ඔහු ඉන්දියා පාර්ලිමෙන්තුව,ඉන්දියා ව්‍යවස්ථාව හෑල්ලූවට ලක්කර ඇතැයිද චෝදනා නගමින් සිටිති.

ඉන්දියාවේ කී‍්‍රඩා හා කලා ක්ෂේත‍්‍රයන්ගෙන් පාර්ලිමේන්තුවට තෝරාගත් සුවිශේෂී පුද්ගලයින් 12 දෙනාගෙන් සචින් එක් අයෙකි.

සචින් පාර්ලිමෙන්තු සභාවාර සදහා සහභාගීවී නැතැයි අනාවරණයවූයේ සමීක්ෂණ සමාගමක් ඉන්දියා පාර්ලිමේන්තු මන්තී‍්‍රවරුන්ගේ පාර්ලිමේන්තු සභාවාර වලට පැමිණීම සම්බන්ධයෙන් කළ සමීක්ෂණයකදීය.එයට අනුව ඔහු අසුනින් පිදුම් ලත්දා පටන් පාර්ලිමෙන්තුවට පැමිණ ඇත්තේ අවස්ථා 3 කදී පමණක් යැයිද මෙම වසරේ මේ දක්වා ඔහු එකදු පාර්ලිමේන්තු සභාවාරයක් සදහාවත් සහභාගීවී නොවී ඇතැයිද හෙළි විණි.

සමික්ෂණ වාර්තාවට අනුව පාර්ලිමේන්තු මන්තී‍්‍රවරුන්ගේ පැමිණීමේ සාමාන්‍යය සියයට 77 ක් වෙද්දී සචින්ගේ පැමිණීමේ සාමාන්‍යය සියයට 3 කි.

එක දිගට සභාවාරයන් 60 කට සහභාගී නොවුවහොත් ඉන්දියා ව්‍යවස්ථාවට අනුව අසුන අහිමිවීමේ අවධානමක් තිබෙන අතර සචින් තවමත් ඒ ආසන්නයට පැමිණ නොමැති බව සඳහන්ය.

මේ ආකාරයටම බොලිවුඩයේ සුපිරි නිළියක් වන රේඛා ටද විශේෂ අසුනක් පිරිනැමි තිබෙන අතර ඇයද සභාවාර සදහා සහභාගී නොවන බව පවසමින් ඇයටද චෝදනා නැගීමට ඉන්දියා පාර්ලිමේන්තු මන්තී‍්‍රවරු කටයුතු කරමින් සිටිති.

මේ දිනවල සචින් ඉතා කාර්යබහුල බව ඔහුගේ කළමණාකරු මේ සම්බන්ධයෙන් ප‍්‍රකාශයක් නිකුත් කරමින් පවසා තිබෙන අතර ඉක්මනින්ම නැගෙන චෝදනා වලට පිළිතුරු සැපයීමටද, වරද නිවැරදි කිරීමටද සචින් කටයුතු කරනු ඇතැයි ඔහු කියා ඇත.