තරුවක් වටා ගමන් නොකරන, බෘහස්පති ග්‍රහයා තරම් අති විශාල, ග්‍රහලෝක කීපයක් ඈත විශ්වයේ පාවෙමින් පවතින බව නාසා ආයතනයේ විද්‍යාඥයෝ පවසති.

අප සෞරග්‍රහ මණ්ඩලයේ විශාලතම ග්‍රහයා ලෙස සැලකෙන්නේ වායුවලින් නිර්මාණය වුණු බෘහස්පති Jupiter ය. විද්‍යාඥයන්ට බෘහස්පති වැනි යෝධ අබිරහස් ග්‍රහයන් හමුවී ඇත්තේ, ජේම්ස් වෙබ් දුරේක්ෂය ආධාරයෙන්, ‘ඔරියන්’ නමැති නෙබියුලාව සිතියම්ගත කරද්දීය.

ජේම්ස් වෙබ් යනු මනුෂ්‍ය වර්ගයා විසින් නිර්මාණය කර, අභ්‍යවකාශයේ ඈත රඳවා තිබෙන අති ප්‍රබ  දුරේක්ෂයකි. මෙය නිර්මාණයට යොදා ගෙන ඇත්තේ ද අති නවීන තාක්ෂණයයි. අප සෞරග්‍රහ මණ්ඩලයේ රහස් පමණක් නොව, විශ්වයේ රහස් ද අනාවරණය කිරීමට ජේම්ස් වෙබ් දුරේක්ෂය සමත් වනු ඇතැයි විශ්වාස කෙරේ.

සාමාන්‍යයෙන් ඕනෑම ග්‍රහ වස්තුවක් තරුවක් වටා ගමන් කරයි. අප හිරු ලෙස හඳුන්වන්නේ අපගේ ග්‍රහ පද්ධතියට අයත් තාරකාවය. ජේම්ස් වෙබ් දුරේක්ෂය සොයා ගත් බෘහස්පති ග්‍රහයා තරම් අති විශාල, ග්‍රහලෝක තනිවම පැවැතීම විද්‍යාඥයන්ට ගැටලුවකි. මෙම ග්‍රහලෝක සැබැවින්ම ග්‍රහලෝකදැයි යන්න පවා ප්‍රහේලිකාවක් වී ඇත. කෙසේ නමුත් විද්‍යාඥයන් මේවා නම් කර ඇත්තේ Jupiter Mass Binary Objects - JuMBOs යන නමිනි.

(ස්තුතිය - නාසා ආයතනයට)