දකුණු කොරියානු රජය, එරට රුසියන් තානාපති ජෝර්ජි සිනෝවීව් කැඳවා දොස් නැගුවේය. දකුණු කොරියානු රජය, එරට රුසියන් තානාපතිවරයාට දොස් නැගුවේ, යුක්රේන යුද්ධයේ දී උතුරු කොරියානු හමුදා සොල්දුදාවන්ගේ සහාය ලබා ගැනීමට රුසියන් රජය සහ එරට ජනාධිපති ව්ලැදිමීර් පුටින් තීරණය කර ඇති බැවිනි.

ඒ සම්බන්ධයෙන් කරුණු පැහැදිලි කරන්නැයි දකුණු කොරියානු නියෝජ්‍ය විදෙස් අමතා්‍ය කිම් හොංග් ක්යුත්, රුසියන් තානාපති ජෝර්ජි සිනෝවීව් ඉල්ලා සිටි අතර, උතුරු කොරියානු හමුදා සොල්දාදුවන් යුක්රේන යුද්ධයට යැමවීට ගත් තීරණය වෙනස් කරන්නැයි ද නියෝජ්‍ය විදෙස් අමතා්‍ය කිම් හොංග් ක්යුත්, රුසියන් තානාපතිවරයා හරහා රුසියාවෙන් ඉල්ලීමක් ද කළේය.

විදෙස් මාධ්‍ය වාර්තා කරන්නේ මේ වනවිටත් යුක්රේන යුද්ධයේ දී රුසියාවට සහාය පළ කිරීමක් ලෙස, උතුරු කොරියානු හමුදා සොල්දාදුවන් 1,500 ක පිරිසක් රුසියාවට ගොස් සිටින බව වාර්තා වේ. 

උතුරු කොරියන් හමුදා සෙබළුන් විදේශ රටක හමුදා මෙහෙයුමකට එක් වුණු පළමු අවස්ථාව වන්නේ මෙයයි. තවත් සෙබළුන් කණ්ඩායම් කීපයක් රුසියාවට යෑමට සූදානමින් සිටින බව ද දකුණු කොරියානු බුද්ධි අංශ අනාවරණය කර ඇත.

න්‍යෂ්ටික බලැති උතුරු කොරියාව සහ රුසියාව අසල්වැසි රාජ්‍යයන් වන අතර, උතුරු කොරියානු නායක කිම් ජොන් උන් සහ රුසියන් ජනාධිපති ව්ලැදිමීර් පුටින් අතරේ සමීප මිත්‍රත්වයක් පවතී. 

යුක්රේන යුද්ධය හේතුවෙන් රුසියාවට ඇමෙරිකාව ඇතුළු බටහිර රටවල් සම්බාධක පනවා ඇති බැවින්, රුසියාව අවි ආයුධ ලබා ගන්නේ උතුරු කොරියාවෙනි.

යුක්රේන යුද්ධයයේදී රුසියාවට අවශ්‍ය අවි ආයුධ උතුරු කොරියාවෙන් රුසියාවට ලැබෙන බව දකුණු කොරියානු බුද්ධි අංශ මෙන්ම ඇමෙරිකන් බුද්ධි අංශ ද අනාවරණය කළේ මීට මාස කීපයකට පෙර සිටය. මේ වනවිට එම අනාවරණ සත්‍යයක් බවට පත් වී අවසන්ය.

(ඒ.එෆ්.පී.)