යුරෝපා රටවල පවතින දැඩි සීත කාලගුණය තවත් මාසයක් පුරාවට පවතිනු ඇතැයි යුරෝපා කාලගුණ විද්‍යා ඒකක අනතුරු අඟවයි. අධික සීතල හේතුවෙන් පුද්ගලයන් 250 කට වැඩි පිරිසක් ජීවිතක්ෂයට පත්ව ඇතැයි ද වාර්තා වේ. වැඩිම ජීවිත හානි වාර්තා වන්නේ යුක්රේනයෙනි. යුක්රේන බලධාරීන් කියා සිටියේ 137 දෙනකු අධික සීතල දරාගත නොහැකිව ජීවිතක්ෂයට පත් ව ඇති බවය. යුක්රේනයේ උෂ්ණත්වය සෙල්සියස් අංශක සෘණ 36 තෙක් පහළ වැටී ඇතැයි එරට කාලගුණ විද්‍යා දෙපාර්තමේන්තුව පවසයි. මේ අතර දැඩි හිමපතනය හේතුවෙන් රටවල් රැසක ගුවන් ගමන්වලට බාධා එල්ල වී ඇත.