මාලි රටේ ටිම්බක්ටු නගරයට පිවිසෙන හමුදා මුරපොළේ ඊයේ (31) සිදුවුණු බෝම්බ පිපිරීමකින් හමුදා සෙබළුන් ඇතුළු 13 දෙනෙක් ජීවිතක්ෂයට පත්වූහ.
එය මරාගෙන මැරෙන බෝම්බකරුවකුගේ ප‍්‍රහාරයක් බවත් බෝම්බකරු නගරයට ඇතුළු වීමටත් උත්සහ කළ බවත් පසුව අනාවරණය විය. 
බෝම්බකරු හමුදා මුරපොළේදී සෝදිසි කිරීමට එහි සිටි මාලි හමුදා සෙබළුන් උත්සහ කර ඇත. බෝම්බකරු බෝම්බය පුපුරුවා හැර ඇත්තේ එම අවස්ථාවේදීය.
දේශපාලනික වශයෙන් අස්ථාවර තත්ත්වයක පසුවන අපි‍්‍රකාවට අයත් මාලි රාජ්‍යයේ පසුගිය වසරේ හමුදා කුමන්ත‍්‍රණයක් ද සිදුවූ අතර එම අවස්ථාවෙන් ප‍්‍රයෝජනගත් ඉස්ලාමීය ජිහාඞ් සටන්කාමීහු එහි නගර රැසක් අත්පත් කර ගත්හ. සටන්කාමීන් අතර උතුරු අපි‍්‍රකා අර්ධද්වීපයේ කි‍්‍රයාත්මක අල් කයිඩා සටන්කාමීහු ද සිටිති. 
අවසානයේදී මාලි රාජ්‍යය සටන්කාමීන්ගෙන් මුදා ගැනීමට අන්තර්ජාතික සහාය මාලි හමුදාවටත් එරට රජයටත් හිමිවිය. බටහිර අපි‍්‍රකා රාජ්‍යයන් සහ අපි‍්‍රකානු සංගමය ද ඔවුන්ගේ හමුදා මාලි රාජ්‍යයට යැවුණේ එක්සත් ජාතීන්ගේ සංවිධානයේ සහ මාලි රාජ්‍යයේ අන්තර්වාර ජනපති ඩියොන් කුන්ඩා ටාරෝගේ ඉල්ලීම පරිදිය.
සටන්කාමීන් පන්නා දැමීමට ඔවුන් අපොහොසත් වූ අතර, ප‍්‍රංශ රජය මැදිහත් වී ඉකුත් ජනවාරි 12 වැනිදා දහසකට ආසන්න හමුදා බළඇණියක් මාලි රටට යැවීය. මාලි රාජ්‍යය කලක් ප‍්‍රංශයේ යටත් විජිතයක් ලෙස පැවැතිණි.