මියන්මාරයට (බුරුමයට) ප‍්‍රජාතන්ත‍්‍රවාදය උදාවන දිනය ඉතා ආසන්න යැයි එරට ප‍්‍රජාතන්ත නායිකා අවුන් සාන් සූ කී පවසයි. සූ කී මේ බව කියා සිටියේ ඊයේ (12) ඇමෙරිකාවේ පිහිටුවූ ‘ආසියා සංවිධානය’ ඇයට සම්මානයක් පිරිනැමූ අවස්ථාවේදීය. මෙතෙක් කලක් බුරුමයට ප‍්‍රජාතන්ත‍්‍රවාදය උදා වී නොතිබුණ ද දැන් ප‍්‍රජාතන්ත‍්‍රවාදය බුරුමයට ළඟා වෙමින් පවතින්නේ යැයි සූ කී පැවැසුවාය. සූ කී එම අවස්ථාවේදී මෑත කාලයේ ව්‍යවහාරයට ගත් ‘මියන්මාරය’ යැයි නොකියා අතීතයේ භාවිතා කළ ‘බුරුමය’ යන නමින් නැවතත් ඇගේ රට හඳුන්වාදීම ද ඉතා සුවිශේෂී සිදුවීමක් යැයි විදෙස් පුවත් වාර්තා කර තිබුණි. මියන්මාරයේ නව සිවිල් රජය එළැඹෙන අපේ‍්‍රල් මාසයේදී අතුරු මැතිවරණයක් පැවැත්වීමට නියමිත අතර සූ කී ද ඊට ඉදිරිපත් වීමට සූදානම් වන්නීය. නොබෙල් සාම ත්‍යාගලාභිනියක ද වන සූ කී ගතවී ගිය විසි වසරින් වැඩි කාලයක් ගත කළේ නිවාස අඩස්සියේය. ඇයට නිදහස හිමිවූයේ ඉකුත් වසරේ මියන්මාරයේ පැවැති මහ මැතිවරණයෙන් පසුවය. එම මැතිවරණයෙන් ජය ගත්තේ මියන්මාර හමුදාවට හිතවත් දේශපාලන පක්ෂය. මියන්මාර නව සිවිල් රජය රටේ ප‍්‍රජාතන්ත‍්‍රවාදය ස්ථාපිත කිරීමෙහිලා හඳුන්වා දුන් දේශපාලන ප‍්‍රතිසංස්කරණ විදේශවල පැසැසුමට ද ලක්වී ඇත.