මියන්මාරයට එරෙහිව පනවා තිබූ වෙළෙඳ සහ ආර්ථික සම්බාධක තවත් ලිහිල් කිරීමට ඇමෙරිකා රජය පෙරේදා (11) තීරණය කළේය. ඒ අනුව ඇමෙරිකා සමාගම්වලට මියන්මාරය සමඟ ආයෝජන අවස්ථා ඇති කර ගැනීමට ඉඩ සැලැසෙන බව ධවල මන්දිරය පවසයි. ඇමෙරිකාව එම සම්බාධක ලිහිල් කළේ වසර 22 කට පසු මියන්මාරය වෙනුවෙන් ඇමෙරිකා රජය පත් කළ තානාපති ඩෙරික් මිචෙල් පෙරේදා නායිපායිදේව් අගනුවරදී මියන්මාර ජනපති ත්වෙන් ස්වෙන්ට හමුවූ අවස්ථාවේදීය. මියන්මාර තානාපති ධුරය වෙනුවෙන් ඩෙරික් මිචෙල් පත් කළේ ඇමෙරිකා ජනපති බැරැක් ඔබාමාය. ඩෙරික් මිචෙල් ආසියා පැසිෆික් කලාපීය කටයුතු සම්බන්ධ ඇමෙරිකානු විශේෂ නියෝජිතවරයා ලෙස ද කටයුතු කළ අයෙකි. මියන්මාරයේ හමුදා රජය පැවැති අවධියේදී ඔවුන්ගේ දළදඬු පාලනය හෙළා දකිමින් ඇමෙරිකාව ද මියන්මාරයට සම්බාධක පැනැවූ අතර සෙසු රටවල් මෙන්ම මියන්මාරය සමඟ රාජතාන්ති‍්‍රක සම්බන්ධකම් අත් හැරියේය. මියන්මාරයේ හමුදා පාලනය අවසන් වීමෙන් පසු වර්තමානයේ පවතින්නේ සිවිල් රජයකි. එම සිවිල් රජය දේශපාලන ප‍්‍රතිසංස්කරණ රාශියක් හඳුන්වා දී ඇති අතර ඒවා ඇමෙරිකාවේ ද පැසැසුමට ලක් විය. මියන්මාරයට එරෙහි සම්බාධක ලිහිල් කෙරෙන්නේ ඒ අනුවය. ඩෙරික් මිචෙල් මියන්මාර ජනපති හමුවීමෙන් පසු එරට විපක්ෂ නායිකා අවුන් සාන් සූ කී හමුවී සාකච්ඡා පැවැත්වූ බව ද වාර්තා වේ.