ධවල මන්දිරියේ ප්‍රවෘත්ති ලේකම් ජෝෂ් අර්නස්ට් අඟහරුවාදා මාධ්‍ය හමුව පවත්වමින් සිටිය දී බෝම්බ බියක් හේතුවෙන් සියලු මාධ්‍යෙව්දින් ඉවත්කැර ධවල මන්දිරයේ උතුරු කොටස හිස් කළ බව විදෙස් මාධ්‍ය වාර්තා කරයි.

ඇමරිකානු රහස් සේවා පැවසුවේ පස්වරු 1.53 ට මාධ්‍ය හමුව පැවැත්වෙන ශාලාවේ බෝම්බයක් ඇති බවට දුරකතන ඇමතුමක් මෙට්රොපොලිටන් පොලීසියට  ලැබුණු බවයි. මේ ඇමතුම හේතුවෙන් ධවල මන්දිරයේ කොටසක් හිස් කැරිණි. පැයකට පසුව ඇමරිකානු කැපිටල් පොලිසියට ලැබුණු දුරකතන ඇමතුමකින් කියවුනේ ධවල මන්දිරයේ ඩර්ක්සන් සෙනෙට් කාර්යාලයේ ද බෝම්බයක් ඇති බවයි.

ඒ අවස්ථාව වනවිට ධවල මන්දීරයේ ඕවල් කාර්යාලයේ සිටි ජනාධිපති බැරක් ඔබාමා එම ස්ථානයෙන් ඉවත්කැර නැත. ජනාධිපති ආර්යාව වන මිචෙල් ඔබාමා සහ දියණියන් දෙදෙනා වන ෂාෂා සහ මාලියා ද ධවල මන්දිරයේ සිටිය ද ඔවුන් සිටි ස්ථාන වලින් ඉවත් කිරීමට ආරක්ෂක නිලධාරින් කටයුතු කැර නැත.

පරික්ෂාවෙන් පසු නැවත ඇරඹි මාධ්‍ය හමුවේදී අර්නස්ට් පවසා ඇත්තේආරක්ෂිත රහස් කටයුතුවල නිරත අයගේ වෘත්තීය නිපුණත්වය අනුව ආරක්ෂාව පිළිබඳ ඔවුන් අවශ්‍ය සියළු තීරණ ගන්නා බව තම විශ්වාසය බවයි. කෙසේ වෙතත් ධවල මන්දිරයේ කොටසක සිටි අය පමණක් ඉන් ඉවත් කලේ ඇයි ද යන්න තවමත් ස්ථිර ලෙස කිව නොහැකි බව ද අර්නස්ට් පවසා ඇත.