පාකිස්තාන මහමැතිවරණය පැවැති පෙරේදා(11) දිනයේදී කරච්චි නුවර ඇතුළු ප‍්‍රධාන නගර රැසකින් ප‍්‍රචණ්ඩකි‍්‍රයා වාර්තා වූ අතර ඡන්දදායකයන් හා මැතිවරණ කාර්යාල ප‍්‍රහාරකයන්ගේ ඉලක්ක විය.

පාකිස්තාන මැතිවරණ කොමිසම ඡන්ද විමසීම පැයකින් දීර්ඝ කිරීමට තීරණය කිරීමෙන් පසුව කරච්චි නුවර බෝම්බ දෙකක් පුපුරා ගියේය. අවාමි ජාතික පක්ෂ කාර්යාලයක් ඉලක්ක කරගෙන එල්ල වූ මේ ප‍්‍රහාරයෙන් 12 දෙනෙක් ජීවිතක්ෂයට පත්ව 37 දෙනෙක් තුවාල ලැබූහ.

පෙෂාවොර් නගරයේ ඡන්දදායකයන් පිරිසක් ඉලක්ක කරගෙන යතුරුපැදියක අටවා තිබූ බෝම්බයක් පුපුරා ගියේය. සිද්ධියෙන් අට දෙනෙක් තුවාල ලැබූහ. 

මේ අතර, බලූකිස්තානය ඇතුළු ප‍්‍රදේශ ගණනාවකින් මරාගෙන මැරෙන බෝම්බ ප‍්‍රහාර, වෙඩිතැබීම්, යතුරුපැදි බෝම්බ පිපිරවීම් වැනි ප‍්‍රචණ්ඩකි‍්‍රයා සිදු වූ බව පාකිස්තාන මාධ්‍ය වාර්තා සඳහන් කරයි.

මහමැතිවරණය ප‍්‍රකාශයට පත් කළ දින සිට අද දක්වා පාකිස්තානයේ සිදු වූ ප‍්‍රචණ්ඩකි‍්‍රයාවලින් මියගිය ගණන 130 දක්වා ඉහළ ගොස් ඇත. තලේබාන් සටන්කාමීන් මැතිවරණ කටයුතු ආරම්භවීමට පෙර සිටම කියා සිටියේ මැතිවරණ කටයුතු නිසි පරිදි පවත්වාගෙන යාමට තමන් ඉඩ නොදෙන බවයි. 

කෙසේ වෙතත් මෙම ප‍්‍රචණ්ඩකි‍්‍රයා මධ්‍යයේ ඡුන්දය ප‍්‍රකාශ කිරීම සියයට 60කටත් වඩා ඉහළ මට්ටමක පැවැති බව එරට මැතිවරණ කොමිසම පෙන්වාදෙයි.

කරච්චි නුවර බෝම්බ ප‍්‍රහාරය එල්ල වූ ස්ථානය