“නෝර්වේ රාජ්‍යයට දරුවෝ ඕනේ. ගොඩක් ඕනේ. ඒක කරන්නේ කොහොමද කියලා මම කාටවත් කියන්න ඕනේ කියලා මම හිතන්නේ නැහැ” නෝර්වේ අගමැතිනිය ඉකුත්දා සිනහා මුසු මුහුණින් පැවැසූවාය. 

එහෙත් ඇය සඳහන් කළ කරුණ සුළුවෙන් තැකිය හැක්කක් නොවේ. 

නෝර්ඩික් කලාපය එසේත් නැතිනම් නෝර්වේ ඇතුළු එම රටවල්වල දරු උපත් සංඛ්‍යාව පහත වැටී තිබේ. 

නෝර්ඩික් කලාපයේ රටවල් ලෙස හැඳින්වෙන නෝර්වේ සහ ඒ ආශ්‍රිත රටවල දරු උපත් සංඛ්‍යාව පසුගිය වසරවලදී ඉහළ අනුපාත පෙන්නුම් කළ කලාපයක් වුවත් මේ වනවිට මෙම පැරැණි මහද්වීපයේ වයස්ගත ජනගහනය වැඩි වෙමින් තිබේ. 

මෙම රටවල දරු උපත් සංඛ්‍යාව අඩු වීමත් සමඟ වයස්ගත ජනගහනය වැඩි වී තිබේ. එම නිසා එම රටවල පවතින බදු ගෙවන ජනතාවගේ මුදලින් නඩත්තු වෙන සුබසාධන රාජ්‍ය ක්‍රමය අර්බුදකාරී තත්ත්වයකට පත්ව ඇත. එනයින් බලන කළ සුබසාධන රාජ්‍ය ක්‍රමයක් පවත්වාගත් මෙම රටවල් අලුත් ප්‍රශ්නයකට මුහුණ දී සිටී. 

“ඉදිරි වසරවලදී මේ ක්‍රමය නිසා අපිට ප්‍රශ්නවලට මුහුණ දෙන්න සිදුවේවි” සිය අලුත් අවුරුදු කතාවේදී නෝර්වේ අගමැතිනි අර්නා සෝල්බර්ග් අනතුරු ඇඟවූවාය. 

“ඉතා සුළු තරුණ පිරිසකට සුබසාධන රාජ්‍යයේ අධික බර දැරීමට සිදුවේවි” යැයි ඇය සඳහන් කළාය.

2017 වසරේදී නෝර්වේ, ෆින්ලන්තය සහ අයිස්ලන්තය යන රටවල උපත් අනුපාත ඉතිහාස ලෙස පහළ ගියේය. එක් කාන්තාවකට උපන් දරුවන්ගේ සංඛ්‍යාව 1.49 ත් 1.71ක් අගයක් ගත්තේය. එහෙත් ඊට පෙර එම අගය 2.1 තරම් ඉහළ වූ අතර ජනගහනයේ ස්ථාවරත්වය පවත්වාගෙන යෑමට එය බෙහෙවින් උපකාරි විය. 

2008 වසරේ ඇති වූ මූල්‍ය අර්බුදයෙන් පසු සෑම නෝඩික් එසේත් නැතිනම් ස්කැන්ඩිනේවියානු රටකම උපත් අනුපාතය පහත වැටුණු බව ඔස්ලෝ විශ්ව විද්‍යාලයේ සමාජ විද්‍යාඥයකු වන ටෲඬේ ලොපගාඞ් පැවැසීය. 

“අර්බුදය අවසන් එහෙත් තවත් කඩා වැටෙනවා” හෙතෙම කීය. 

“නෝඩික් රටවල ජන විකාශනය අපට කරුණු දෙකක් අනාවරණය කරනවා. අද වනවිට දරුවන් කිහිපදෙනකු සිටින විශාල පවුල් තිබෙන්නේ කිහිපයක් පමණක් යන්න ඉන් එක් කරුණක්. අනෙක් කරුණ නම් කාන්තාවන් තම පළමු දරුවා ලබන්නට දීර්ඝ කාලයක් බලා සිටිනවා යන්නයි” ඔහු කීවේය. 

මේ ත්ත්වය එක් හේතුවක් නොමැති එක් කරුණකින් පමණක් විස්තර කළ නොහැක. මූල්‍ය අස්ථාවරත්වය, ගෘහ ඒකකවල වියදම් ඉහළ යෑම ඊට ප්‍රධාන හේතු දෙකක් ලෙස පෙන්වා දිය හැක. 

මේ අනුව දීර්ඝ කාලයේදී වැඩ කරන වයසේ ජනතාව අඩු වන අතර ඒ නිසා බදු ගෙවන පිරිස ද ක්‍රමයෙන් අඩු වේ. මෙම රටවල් පවත්වාගෙන යන සුබසාධන රාජ්‍ය ක්‍රමයට අරමුදල් සපයන්නේ ඒ රටවල සිටින බදු ගෙවන ජනතාවය. මේ අනුව බලන කල බදු ගෙවන ජනතාව ක්‍රමයෙන් අඩුවීම නිසා සුබසාධන රාජ්‍ය ක්‍රමය තර්ජනයට ලක්ව තිබේ. 

ඒ.එෆ්.පී. ඇසුරිනි 

055