පාකිස්තාන රජය පෙරළන්න පාකිස්තාන තලේබාන් නායකයකු වන ෆසුල්ලාට ඇෆ්ගන් රජයේ සහාය සහ රැකවරණ ලැබෙන බව පාකිස්තාන රජය චෝදනා කරයි. දරුණු සටන්කාමියකු වන ෆසුල්ලා ප‍්‍රමුඛ සටන්කාමීන් පිරිසක් ඇෆ්ගනිස්තානයට පලා ගියේ මීට වසර කිහිපයකට පෙරය. ඒ, පාකිස්තාන හමුදා ස්වාත් නිම්නයේ මෙහෙයුම් සිදු කළ අවස්ථාවේදීය ඇෆ්ගනිස්තානයේ සිටි ෆසුල්ලා සහ ඔහුගේ සටන්කාමීන් මෙහෙයවමින් ඇෆ්ගන්/පාකිස්තාන දේශසීමාවේ සිටින පාකිස්තාන හමුදා සෙබළුන් ඉලක්ක කර ගනිමින් ප‍්‍රහාර එල්ල කරයි. මීට සති කීපයකට පෙර පාකිස්තාන හමුදා අවස්ථා කිහිපයකදීම ෆසුල්ලා සහ ඔහුගේ සටන්කාමීන් ඉලක්ක කරගෙන ප‍්‍රහාර එල්ල කළේය. එම අවස්ථාවේදී ඇෆ්ලන් රජය චෝදනා කළේ පාකිස්තානය දේශසීමා උල්ලංඝනය කරමින් තම රටට පහර දෙන බවත් එයින් සිවිල් වැසියන් ජීවිතක්ෂයට පත් වන බවත්ය. ඇෆ්ගනිස්තානයට පහර දීමෙන් වැළකින ලෙස නේටෝව ද පාකිස්තාන රජයට අනතුරු අඟවා ඇත. ”ෆසුල්ලා සැඟවී සිටින්නේ ඇෆ්ගනිස්තානයේ. ඒ බව ඇෆ්ගන් රජය දන්නවා. ඔහුට රැකවල් දෙන්නේ ඇෆ්ගන් රජය” යැයි අභ්‍යන්තර කටයුතු ඇමැති රෙහ්මාන් මලික් චෝදනා කරයි. ඇමැතිවරයා මෙසේ චෝදනා කළේ පසුගිය දිනෙක පැවැති මාධ්‍ය හමුවකට සහභාගී වෙමිනි. ෆසුල්ලා ඇෆ්ගනිස්තානයේ සැඟවී සිටින බව දැක්වෙන බුද්ධි අංශ වාර්තා ද ඔහු මාධ්‍යවේදීන්ට පෙන්නුවේය. ෆසුල්ලා අල්ලා ගැනීමට සහාය දෙන්නැයි ඇෆ්ගන් රජයෙන් ඉල්ලා සිටියත් ඊට යහපත් ප‍්‍රතිචාරයක් නොලැබීමෙන් පෙනී යන්නේ පාකිස්තානයේ රජය පෙරළන්න ඇෆ්ගන් රජය ෆසුල්ලාට සහාය දෙන බව යැයි ද ඇමැති මලික් වැඩිදුරටත් කියා සිටියේය.