ගාසා තීරයට පහර දෙමින්, ඊශ්‍රායලය සිදු කරන ජන සංහාර වහා නැවැත්වීමට මැදිහත් වෙන්නැයි ඉරානය, ඇමෙරිකාවේ නව ජනාධිපති ලෙස තේරී පත් වුණු රිපබ්ලිකන් අපේක්ෂක ඩොනල්ඩ් ට්‍රම්ප්ගෙන් ඉල්ලීමක් කර ඇත.

ඉරාන රජය වෙනුවෙන් එම ඉල්ලීම කළ ඇත්තේ ඉරාන විදේශ අමත්‍යාංශයයි. ඉරාන විදේශ අමත්‍යාංශ ප්‍රකාශක ඉස්මායිල් බගායී මෙම ඉල්ලීම කළේ ටෙහෙරාන් අගනුවර මාධ්‍ය හමුවක් අතරතුරේ ගාසා තීරය සම්බන්ධයෙන් මාධ්‍යවේදීන් ප්‍රශ්න නැගූ අවස්ථාවේදීය.

ට්‍රම්ප් දීර්ඝ කාලීනව, ඊශ්‍රායලයේ සමීප මිතුරකු බැවින්, ඔහු ඉරානය සම්බන්ධයෙන් දැඩි පිළිවෙතක් අනුගමනය කරනු ඇතැයි දේශපාලන විශ්ලේෂකයන්ගේ අදහසය.

මැතිවරණ සමයේ දී ට්‍රම්ප් ඝාතන සැලැසුම් ක්‍රියාත්මක වූ අතර, එම සැලැසුම් පසුපස සිටින්නේ ඉරානය සහ ඉරානයේ විප්ලවීය හමුදාව යැයි දිගින් දිගටම චෝදනා එල්ල වී ඇත.

ඒ අනුව, ට්‍රම්ප් ඉරානයේ ඉල්ලීමට කන්දෙනු ඇතැයි සැකසහිත බව දේශපාලන විශ්ලේෂකයෝ පෙන්වා දෙති.

මේ අතර ඊශ්‍රායලය සහ ගාසා තීරයේ හමාස් සංවිධානය අතරේ පවතින ගැටුම් නිරාකරණය කර දී, සටන් විරාමයක් සඳහා මැදිහත් වීමට තමන් ද සූදානම් බව රුසියාව පවසා ඇත.