ගිණිකොන චීනයේ පෙරේදා (25) හටගත්, රික්ටර් මාපකයේ ප‍්‍රබලත්වය ඒකක 5.7 ක් සටහන් කළ භූමි කම්පාවකින් සිව්දෙනකු ජීවිතක්ෂයට පත්වූ අතර 104 දෙනෙක් තුවාල ලැබූහ. අලූයම 4 ට පමණ හටගත් එම භූමි කම්පාවේ අපිකේන්ද්‍රය පිහිටා ඇත්තේ යූනාන් සහ සිචුවාන් පළාත් මායිම අසළ යැයි චීන භූ විද්‍යා සහ පතල් කාර්යාංශය නිවේදනය කරයි. ප‍්‍රධාන භූමි කම්පාවෙන් පසු රික්ටර් මාපකයේ ඒකක 3.3 ක් සහ 3.2 ක් සටහන් කළ පසු කම්පන දෙකක් ද හටගෙන තිබේ. භූමි කම්පාව හේතුවෙන් ගම්මාන කීපයක් මුළුමනින්ම විනාශ වී ඇතැයි ද වාර්තා වේ. කඩා වැටුණු නිවාසවල සුන්බුන් අතර සිරවූවන් සෙවීමේ මෙහෙයුම් තවමත් සිදුවෙමින් පවතින බව ප‍්‍රාන්ත බලධාරීහු පවසති. තුවාල ලැබූවන්ට කඩිනමින් වෛද්‍ය ප‍්‍රතිකාර ලබා දීමට සහන සේවකයෝ පියවර ගත්හ. චීන ෂිංහුවා පුවත් සේවය පවසන්නේ තුවාල ලබා රෝහල් ගත කළ පිරිසෙන් විසි දෙනකුගේ තත්ත්වය බරපතළ බවය.