හිටපු අග්‍රාමාත්‍ය ෂෙන්සෝ අබේගේ ඝාතනයට හේතුව තවමත් නිශ්චිතව පැහැදිලි නැතැයි පොලිසිය පවසයි. 67 හැවිරිදි අබේ වෙඩි තබා ඝාතනය කෙරුණේ පසුගිය සිකුරාදා (8) ය.

වෙඩි තැබීම කළේ 41 ක් හැවිරිදි ටෙට්සුයා යමගාමී නමැති ජපාන ජාතිකයාය. ටෙට්සුයා යමගාමී, පොලිස් අත්අඩංගුවට පත් වුණු අතර, ඔහුගෙන් දිගින් දිගටම ප්‍රශ්න කරන බව පොලිසිය පවසයි.

ප්‍රශ්න කිරීම්වලදී පොලිසිය අනාවරණය කරගත් කරුණු අනුව, ටෙට්සුයා යමගාමී තනිවම මෙම ඝාතනය සිදු කර ඇත. ඔහු මාස කීපයක් ඝාතනය සැලැසුම් කර තිබේ.

යමගාමී, පොලිසියට පවසා ඇත්තේ ෂෙන්සෝ අබේ එක්තරා ආගමික කණ්ඩායමකට සම්බන්ධ බවත් එම ආගමික කණ්ඩායම වෙනුවෙන් ප්‍රචාරණ කටයුතුවල නියැලී ඇති බවත්ය.

යමගාමී පවසන ආකාරයට ඔහුගේ මව මෙම ආගමික කණ්ඩායමට එක් වී එයට නොමසුරුව මුදල් ආධාර ලබා දී ඇත. ආගමික කණ්ඩායමට එක් වුණු බැවින්, අවසානයේ ඇය බංකොලොත් වී ඉතා අසරණ තත්ත්වයකට පත් වී ඇත.

තම මව ආගමික කණ්ඩායම සමඟ එක් වෙනවාට තමන් තදින් විරෝධය දැක්වූ නමුත් තම මව අග්‍රාමාත්‍ය අබේ කෙරෙහි දැඩි විශ්වාසයෙන් සිටි බැවින් ආගමික කණ්ඩායම සමඟ එක් වී ඊට මුදල් පරිත්‍යාග කළේ යැයි යමගාමී පොලිසිය සමඟ පවසා තිබේ.

පොලිසිය පවසන ආකාරයට, හිටපු අග්‍රාමාත්‍ය ෂෙන්සෝ අබේ, අග්‍රාමාත්‍ය ධුරය හොබවද්දී හෝ 2020 වසරේ ධුරයෙන් ඉවත් වීමෙන් පසුව හෝ කිසිදු ආගමික කණ්ඩායමක් සමඟ ගනුදෙනු කර නැත. යමගාමී, ෂෙන්සෝ අබේ සම්බන්ධයෙන් එල්ල කරන චෝදනා තවමත් තහවුරු කිරීමට හැකියාවක් ලැබී නැති බවත්, පුළුල් ලෙස විමර්ශන කටයුතු සිදු කරන බවත් පොලිසිය මාධ්‍ය හමුවේ පවසා තිබේ.

යමගාමී ජපාන නාවික හමුදාවේ ස්වේච්ඡා බලකා සාමාජිකයකු ලෙස වසර 3 ක් සේවය කළ අයකු බව ද පැවැසෙයි. ඒ, 2002 සිට 2005 තෙක් කාලයේය. 2020 දී යමගාමී, ක්යෝටෝ නුවර කර්මාන්ත ශාලාවක, ෆෝක්ලිෆිට් යන්ත්‍ර ක්‍රියාකරවන්නකු ලෙස ද රැකියාව කළ බව පැවැසෙයි.

ජපාන පාර්ලිමේන්තුවේ ඉහළ මන්ත්‍රී මණ්ඩලයට නියෝජිතයන් තෝරා ගැනීමේ ඡන්ද විමසුමක් පැවැත්වීමට නියමිත අතර, ඒ සම්බන්ධයෙන් මැතිවරණ රැලි සෑම නගරයකම පාහේ පැවැත්වෙයි. නාරා නගරයේ මැතිවරණ රැළියට හිටපු අග්‍රාමාත්‍ය ෂෙන්සෝ අබේ එක් වූයේත්, මැතිවරණ රැළිය අමතමින් කතා කළේත් සිය ලිබරල් පක්ෂයට සහ පක්ෂයේ නායක, වත්මන් අග්‍රාමාත්‍යවරයා ද වන ෆුමියෝ කිෂිඩාට පළ කිරීමක් ලෙසය.

ටෙට්සුයා යමගාමී, හිටපු අග්‍රාමාත්‍යවරයාට වෙඩි තැබීමට භාවිතා කළේ ඔහු විසින් එකලැස් කර, ටේප් පටිවලින් එකට සවි කළ බැරල් දෙකේ තුවක්කුවකිනි. තුවක්කුව නිපදවීමට අවශ්‍ය කොටස් ඔහු මිලදි ගෙන ඇත්තේ අන්තර් ජාලය හරහා බව පොලිසිය අනාවරණය කරගෙන තිබේ.

ෆුමියෝ කිෂිඩා, හිටපු අග්‍රාමාත්‍යවරයාට වෙඩි තැබුවේ ඔහුට අඩි කිහිපයක් පිටුපස සිටය. හිටපු අග්‍රාමාත්‍යවරයාට ප්‍රමාණවත් ආරක්ෂාවක් ලබා දීමට පොලිසිය සහ ආරක්ෂක අංශ අසමත් වූ බව ද මේ වනවිට තහවුරු වී තිබේ.

(ඒ.එෆ්.පී.)