කොරියානු අර්ධද්වීපයේ හටගෙන ඇති යුද උණුසුම පහව යනතෙක් අන්තර් මහද්වීපික බැලස්ටික මිසයිල අත්හදා බැලීම ප‍්‍රමාද කරන බව ඇමෙරිකානු ආරක්ෂක ලේකම් චක් හේගල් ඊයේ (7) පැවැසීය. 
කැලිෆෝනියා ප‍්‍රාන්තයේදී මෙම මිසයිල අත්හදා බැලීම සිදු කිරීමට නියමිතව තිබිණි. ඒ, එළැඹෙන මැයි මාසයේදීය. ඇමෙරිකානු මිසයිල අත්හදා බැලීම කොරියානු අර්ධද්වීපය යුද්ධයකට ඇද දැමිය හැකි බවට ජාත්‍යන්තර ප‍්‍රජාව අදහස් පළ කිරීමත් සමඟ ඇමෙරිකානු ආරක්ෂක ලේකම්වරයා මෙම තීරණය ගෙන ඇත.
මිසයිල අත්හදා බැලීම සිදු කිරීමේ අරමුණ වූයේ ඇමෙරිකාව සතු අවිවල තත්ත්වය පරීක්ෂා කිරීමට පමණක් බවත් එය වෙනත් රටක් කුපිත ගැන්වීමේ ප‍්‍රයත්නයක් නොවන බවත් ඇමෙරිකා යුද දෙපාර්තමේන්තුව හෙවත් පෙන්ටගනය පෙන්වාදෙයි.
පසුගිය සති කිහිපය තුළ උතුරු කොරියාවට සම්බාධක පැනවීමත්, දකුණු කොරියාවේ යුද අභ්‍යාසවලට ඇමෙරිකාවේ සහාය හිමිවීමත් සමඟ න්‍යෂ්ටික යුද්ධයක් ඇරඹීමේ අවදානමක් මතු විය. ඉකුත් සතිඅන්තයේදී  යුද්ධයකට සූදානම්වීමක් ලෙස උතුරු කොරියාව සිය නැගෙනහිර වෙරළ තීරය ආසන්න කලාපයේ මැදි දුර මිසයිල කිහිපයක් ස්ථානගත කළේය.
මේ අතර, උතුරු කොරියාවේ රැඳී සිටින බටහිර රටවල තානාපති නිලධාරීන්ට අපේ‍්‍රල් 10 වැනිදාට පෙර රටින් ඉවත්වන ලෙසත් නියමිත දිනට පසුව ඔවුන්ගේ ආරක්ෂාව පිළිබඳව තමන් සහතිකවිය නොහැකි බවත් උතුරු කොරියානු රජය පවසයි. 
මෙයට ප‍්‍රතිචාර දැක්වූ බොහෝ රටවල් පැවැසුවේ හදිසියේ තානාපති නිලධාරීන් සිය රට ගෙන්වා ගැනීමට අපේක්ෂාවක් නොමැති බවයි.