දුෂණ වංචා සහ මිනීමැරුම් චෝදනා මත සිරභාරයට ගනු ලැබ සිටි ඊජිප්තුවේ හිටපු ජනාධිපති හොස්නි මුබාරක් ඊයේ (21) ඇපමත නිදහස ලැබීය.
මුබාරක්ට නිදහස හිමිවුණේ, එල්ල වී තිබුණු දුෂණ වංචා චෝදනා සම්බන්ධයෙන් ඔහු වරදකරුවකු නොවන බව කයිරෝ අධිකරණයක් තීන්දු කිරීමෙන් පසුවය.

ඇපමත නිදහස ලැබුවත් 85 හැවිරිදි මුබාරක් තව දුරටත් නිවාස අඩස්සියේ රඳවා තැබීමට ද අධිකරණය තීන්දු කළේය. ඒ, මුබාරක්ට එරෙහිව මිනීමැරීමේ චෝදනා ද එල්ල වී ඇති නිසාය.

2010 වසරේ දී මුබාරක් ජනපති ධුරයේ සිටිද්දී, ඔහුටත් ඔහුගේ රජයටත් එරෙහිව සාමකාමී අන්දමින් විරෝධතා පැවැත් වූ විරෝධතාකරුවන්ට වෙඩි තැබීමට මුබාරක් අණ දුන්නේය. පොලිසිය සිදුකළ වෙඩි තැබීම්වලින් විරෝධතාකරුවෝ සියයකට වැඩි පිරිසක් ජීවිතක්ෂයට පත්වූහ.

2010 වසරේ සිදුවුණු රාජ්‍ය පෙරැුළියෙන් පසු, වසර 30 ක් තිස්සේ ජනපති ධුරයේ සිටි මුබාරක්ගේ පාලනය ද අවසන් විය. ජනපති ධුරයෙන් ඉවත් වීමෙන් පසු, මුබාරක් රෝගී වූයේය. ඔහුට පිළිකාවක් ඇති බව ද වෛද්‍යවරු පැවැසූහ. ඔහු අධිකරණයට ගෙන එනු ලැබුවේද ගිලන් ඇඳ පිටින්ය.

2010 වසරේ මුබාරක්ට එරෙහිව ජනතා විරෝධය ඉස්මතු වූ අවස්ථාවේදී ඔහු පොලිසිය යෙදවීම නිසා විරෝධතාකරුවෝ දහසකට ආසන්න පිරිසක් ජීවිතක්ෂයට පත්වූහ. මුබාරක්ට මිනීමැරුම් චෝදනා එල්ල වූයේ ඒ අනුවය.

ජනතා විරෝධය මැද ජනපති ධුරයෙන් මුබාරක් ඉවත් වූයේ, හමුදා පාලක මණ්ඩලයක් පිහිටුවා ඊට රටේ බලය පවරා දීමෙන් පසුවය. ජනපති මොහොමඞ් මොර්සිට එරෙහිව හමුදා කුමන්ත‍්‍රණය දියත් කළේ ද එම හමුදා පාලක මණ්ඩලයයි.