කයිරෝ නුවර ඇමෙරිකා තානාපති කාර්යාලය ඉදිරිපිට ප‍්‍රචණ්ඩකාරී ලෙස සිදුකෙරෙන විරෝධතා සම්බන්ධයෙන් අදහස් දැක්වූ ඇමෙරිකා ජනපති බැරැක් ඔබාමා සඳහන් කළේ ඊජිප්තුව සිය මිතුරෙක්වත් සතුරෙක්වත් නොවන බවයි. ඉස්ලාම් ආගමට නිගරුවන අන්දමින් ඇමෙරිකාවේදී නිෂ්පාදනය කරන ලද චිත‍්‍රපටය සම්බන්ධයෙන් විරෝධය පෑමට දහස්ගණන් ඊජිප්තු වැසියන් පෙරේදා (12) කයිරෝ නුවර ඇමෙරිකා තානාපති කාර්යාලය ඉදිරිපිටට රැස් වී ප‍්‍රචණ්ඩකාරී ලෙස විරෝධතාවල නිරත වූහ. මේ අයුරින් කයිරෝ නුවර විරෝධතා ආරම්භ වූයේ ලිබියාවේ ඇමෙරිකා තානාපති කාර්යාලයට ප‍්‍රහාර එල්ල කර එහි සිටි ඇමෙරිකා තානාපති කි‍්‍රස්ටෝපර් ස්ටීවන්ස්  ඝාතනය කිරීමත් සමඟය. දිගු කාලයක් ඊජිප්තුව පාලනය කළ හොස්නි මුබාරක් බලයෙන් පහ කිරීමෙන් අනතුරුව පැවැති ජනාධිපතිවරණයේදී මොහොමඞ් මොර්සි එරට පළමු ඉස්ලාමීය ජනපතිවරයා ලෙස බලයට පත් විය. ඇමෙරිකා ජනාධිපති මෙවැනි ප‍්‍රකාශක් කිරීමට හේතු වූයේ ලිබියාවේ ඇමෙරිකා තානාපති කාර්යාලයට එල්ල වූ ප‍්‍රහාරයයි. ලොව ප‍්‍රධාන පෙළේ රාජ්‍ය නායකයන් මෙම ප‍්‍රහාරය හෙළා දකිමින් ප‍්‍රකාශ නිකුත් කළ ද ඊජිප්තු ජනපති එසේ නොකර සිද්ධියට තුඩු දුන් ඉස්ලාම් විරෝධී චිත‍්‍රපටය සම්බන්ධයෙන් පමණක් අප‍්‍රසාදය පළ කිරීම මීට හේතුවී ඇති බව විදෙස් විශ්ලේෂකයෝ පෙන්වාදෙති.