මධ්‍යම ඉරාකයේ ජනාකීර්ණ ස්ථානයකදී පෙරේදා(3) ට‍්‍රක් රථයක අටවන ලද බෝම්බයක් පුපුරා යාමෙන් 26 දෙනකු ජීවිතක්ෂයට පත් වූ බවත් රට තුළ හට ගෙන ඇති නොසන්සුන්කාරී වාතාවරණය හේතුවෙන් ප‍්‍රදේශ කිහිපයක සිදු වූ බෝම්බ පිපිරීම් හේතුවෙන් තවත් 12 දෙනකු ජීවිතක්ෂයට පත්ව ඇති බවත් වාර්තා වේ. එළඹෙන සිකුරාදා දිනයේදී පැවැත්වීමට නියමිත ෂියා ආගමික උත්සවයකට සහභාගී වීමට පැමිණෙන ෂියා බැතිමතුන් ඉලක්ක කරගෙන මෙම ප‍්‍රහාර එල්ල වී තිබෙන බවත් මෙම ගැටුම් හේතුවෙන් සියයකට අධික පිරිසක් තුවාල ලබා ඇති බවත් ඉරාක ආරක්ෂක අංශ නිලධාරියෙක් පැවැසීය. බැග්ඩෑඞ් නුවරට දකුණින් පිහිටි ඩිවනියා නගරයේ වෙළෙඳපොළක් ආසන්නයේදී ට‍්‍රක් රථයේ ඇට වූ බෝම්බය පුපුරා ගොස් ඇත. සිද්ධියෙන් ඒ අසල සිටි 26 දෙනකු ජීවිතක්ෂයට පත්ව 50 දෙනකු තුවාල ලබා ඇති බවත් වාර්තා වේ. මේ සිද්ධියෙන් අනතුරුව ලක්ෂ හතරකට අධික ජනතාවක් වාසය කරන ඩිවනියා නගරයට ඇඳිරි නීතිය පැනවූ බව ද ඔහු සඳහන් කළේය. මෙම ප‍්‍රහාරවලට අමතරව කර්බාලා, ටාජි සහ ටුස් කුර්මාටු යන ප‍්‍රදේශවලින් ද බෝම්බ පිපිරීමේ සිද්ධි වාර්තා වන බව ඉරාක ආරක්ෂක අංශ පවසයි. ‘කර්බාලා නගරයට විශාල පිරිසක් මේ වන විට පැමිණෙමින් සිටිති. අල් කයිඩා සටන්කාමීන් සහ අන්තාවාදී පිරිස් ජනවාර්ගික ගැටුම් ඇවිලවීමේ අරමුණින් මෙම ප‍්‍රහාර එල්ල කරනවා’ යැයි විදෙස් විශ්ලේෂකයෙක් වන ජෝන් ඩ්‍රේක් සඳහන් කළේය.