ලතින් ඇමෙරිකාවට අයත් ඉක්වදෝරයේ ජනාධිපති ඩැනියෙල් නෝබෝවා, විරෝධතාකරුවන් පිරිසකගේ ප්‍රහාරයකට ලක් විය.

ජනාධිපතිවරයා මෙසේ විරෝධතාකරුවන්ගේ ප්‍රහාරයකට ලක්වූයේ එල් ටැම්බෝ පළාතේ ජල පිරිපහදු කම්හලක නිරීක්ෂණ චාරිකාවට ගිය අවස්ථාවේදීය.

ජනාධිපති නෝබෝවා, එම පිරිපහදුවට පැමිණියේ ඔහුගේ මෝටර් රථයෙනි. ජනාධිපතිවරයාගේ ආරක්ෂාවට ආරක්ෂක අංශ සාමාජිකයෝ ද සිටියහ.

ජනාධිපතිවරයා රිදී පැහැති එස්.යූ.වී. මෝටර් රථය පිරිපහදුවට පැමිණෙද්දී, පන්සීයක පමණ විරෝධතාකරුවෝ පිරිසක් ආරක්ෂක අංශ නිලධාරීන් සහ පොලිස් නිලධාරීන් තල්ලු කර දමා එය වටකරගෙන ඊට ගල් ගසන්න වූහ.

මෝටර් රථයට වෙඩි ප්‍රහාරයක් ද එල්ල වූ බව පැවැසෙයි. මේ බව පැවැසුවේ ජනාධිපති නෝබෝවා සමඟ පිරිපහදුවට ගිය ඉක්වදෝර පරිසර සහ බලශක්ති අමාත්‍ය ඉනේස් මන්සානෝය.

ජනාධිපති නෝබෝවා ට කිසිදු අනතුරක් සිදු නොවිණි.

පරිසර අමාත්‍යවරයා පසුව මාධ්‍ය හමුවේ පැහැදිලි කළේ,  එම විරෝධතාව අතරතුරේ ජනාධිපතිවරයා ඝාතනය කිරීමට ද උත්සාහයක් ගත් බවය.

සිද්ධිය ගැන පුළුල් විමර්ශනයක් ආරම්භ කර ඇති බවත්, ඊට සම්බන්ධ පුද්ගලයන් සොයා දඩුවම් කරන බවත් ජනාධිපති කාර්යාලය නිකුත් කළ නිවේදනයක දැක්වෙයි.

මෝටර් රථය වට කරගෙන ඊට ගල් ප්‍රහාර එල්ල කළ පස් දෙනකු එම අවස්ථාවේදීම පොලිසිය විසින් අත්අඩංගුවට ගනු ලැබූ බව ද පැවැසෙයි.

ඩැනියෙල් නෝබෝවා, ඉක්වදෝරයේ ජනාධිපති ධුරයට පත්වූ ළාබාලතම තැනැත්තාය. වාමාංශික දේශපාලනඥයකු වන ඔහු පසුගිය අප්‍රේල් පැවැති ජනාධිපතිවරණයෙන් ද ජයග්‍රහණය කළේය. ඒ, දෙවැනි වටයේ දී ප්‍රතිවාදියා වූ ලුයිසා ගොන්සාලෙස් පරාජය කරමිණි.