ඇෆ්ගනිස්තානයේ කාබුල් අගනුවර, විදේශ කටයුතු අමත්‍යාංශය ඉදිරිපිට බෝම්බයක් පිපිරී 20 දෙනෙක් ජීවිතක්ෂයට පත්වූහ. තුවාල ලබා රෝහල්ගත කළ ගණන 40 ක් යැයි ඇෆ්ගනිස්තානයේ ක්‍රියාත්මක රාජ්‍ය නොවන සංවිධාන පවසයි.

එය මරාගෙන මැරෙන බෝම්බ ප්‍රහාරයක් බවත්, බෝම්බ ප්‍රහාරය එල්ල කළේ ඇෆ්ගන් අයි.එස්. ත්‍රස්තවාදීන් බවත් ඇෆ්ගන් තලේබාන් රජය නිකුත් කළ නිවේදනයක දැක්වෙයි. ඇෆ්ගන් අයි.එස්. ත්‍රස්ත කල්ලිය ද ප්‍රහාරයේ වගකීම බාරගෙන ඇත.

ඇෆ්ගන් විදේශ කටයුතු අමත්‍යාංශය පිහිටා ඇත්තේ අධි ආරක්ෂිත කලාපයකය. මරාගෙන මැරෙන බෝම්බකරු ආරක්ෂක අංශ මඟහැර අමාත්‍යාංශ ගොඩනැගිල්ල ඉදිරියට පැමිණ බෝම්බය පුපුරුවා ගත් බව සිද්ධිය දුටුවෝ පවසති.

ඇෆ්ගන් විදේශ කටයුතු අමත්‍යාංශය ඉදිරිපිට සිදුවුණු බෝම්බ ප්‍රහාරය සම්බන්ධයෙන් ඇමෙරිකාව ද ඇෆ්ගන් තලේබාන් රජයට සිය කනගාටුව පළ කර ඇත. තලේබාන්වරුන් ඇෆ්ගනිස්තානයේ යළි බලය අල්ලා ගනිමින් රජයක් පිහිටුවා ගත්තේ 2021 අගෝස්තු මාසයේය. ඒ, ඇමෙරිකන් හමුදා තලේබාන්වරුන්ට එරෙහි යුද මෙහෙයුම් අවසන් කර ඇෆ්ගනිස්තානයෙන් පිටවී යෑමෙන් පසුවය.

ඇෆ්ගනිස්තානයේ ක්‍රියාත්මක වන්නේ ‘කොරසන්’ නමැති පළාතෙන් බිහිවුණු අයි.එස්. ත්‍රස්ත කල්ලියයි. මෙම කල්ලිය හැඳින්වෙන්නේ ‘කොරසන් අයි.එස්. ත්‍රස්තවාදීන්’ යනුවෙනි. මෙම ත්‍රස්ත කල්ලිය සමඟ තලේබාන් අත්වාදීන් එක් වී සිටින බව පැවැසෙයි. ඇෆ්ගන් තලේබාන් රජයට, කොරසන් අයි.එස්. ත්‍රස්ත කල්ලිය තර්ජනයක් බව ඇමෙරිකන් බුද්ධි අංශ පෙන්වා දී තිබේ.

(ඒ.එෆ්.පී.)