ඇමෙරිකා නව ජනාධිපති ඩොනල්ඩ් ට්‍රම්ප් විසින් පත් කරනු ලැබූ නව රාජ්‍ය ලේකම් මාර්කෝ රූබියෝ, සිය පළමු විදෙස් සංචාරය ලෙස තෝරාගෙන ඇත්තේ පැනමා රාජ්‍යය බව පැවැසෙයි.

ඇමෙරිකාවේ 72 වැනි රාජ්‍ය ලේකම්වරයා ද වන මාර්කෝ රූබියෝ, එම ධුරයට පත්වුණු පළමු ලතින් ඇමෙරිකානු සම්භවයක් ඇති ඇමෙරිකානු ජාතිකයාය.

රූබියෝ, සිය පළමු විදෙස් සංචාරය ලෙස තෝරාගෙන ඇත්තේ ලතින් ඇමෙරිකාව වන අතර පැනමාව ලතින් ඇමෙරිකානු රාජ්‍යයකි. පැනමා සංචාරයෙන් පසු, රූබියෝ ගේතමාලාවට, එල් සැල්වදෝරයට, ඩොමිනිකන් ජනරජයට සහ කොස්ටා රීකා රාජ්‍යයට යෑමට සූදානමින් සිටී.

නව ජනාධිපති ඩොනල්ඩ් ට්‍රම්ප් සහ පැනමා රජය සමඟ මේ වනවිට අර්බුදයක් පවතී. රූබියෝ, පැනමාවට යන්නේ එම අර්බුදය සම්බන්ධයෙන් පැනමා බලධාරීන් සමඟ සාකච්ඡා පැවැත්වීමටය.එම අර්බුදය පවතින්නේ පැනමා ඇළ සම්බන්ධයෙනි.

පැනමා ඇළ යනු ලෝකයේ ඉන්ජිනේරු විස්කමකි. එය අත්ලාන්තික් සාගරයත් පැසිෆික් සාගරයත් යා කරන කිලෝ මිටර් 82 ක ඇළ මාර්ගයකි. වෙළෙඳ කටයුතුවලදී පැනමා ඇළ ඉතා වැදගත් මුහුදු මාර්ගයකි. 

අතීතයේ පැනමා රජය සමඟ එක් වී මෙය ඉදි කළේ ඇමෙරිකාවය. ඉන්පසු ඇමෙරිකාව සහ පැනමාව එක්ව, වසර ගණනක් පැනමා ඇලේ කටයුතු කළමනාකරණය කළේය. පැනමා ඇල ඇමෙරිකාව පැනමාවට ලබා දුන්නේ 1999 දෙසැම්බර් 31 වැනිදාය. ඒ, 1977 දී එවකට ඇමෙරිකන් ජනාධිපති ජිමී කාටර් මැදිහත් වී පැනමා රජය සමඟ ඇති කරගත් ගිවිසුමකට අනුවය. 

ට්‍රම්ප් චෝදනා කර ඇත්තේ ඇමෙරිකන් නෞකා පැනමා ඇළ හරහා යද්දී, පැනමා රජය අසාධාරණ ආකාරයට එම නෞකාවලින් වැඩි ගාස්තු අය කරන බවටය. පැනමාව තමාට පිළිගත හැකි ආකාරයකට පැනමා ඇළ කළමනාකරණය නොකරන්නේ නම් තමන් පැනමා ඇළේ අයිතිය යළි ඇමෙරිකාවට පවරා ගැනීමට කටයුතු කරන බව ට්‍රම්ප් දිගින් දිගටම පවසා ඇත. මෙය පැනමා ජනාධිපති රාවුල් මුලීනෝ ප්‍රමුඛ රජයේ දැඩි විරෝධයට හේතුවක් වී තිබේ.