අයි.එස් සංවිධානය පරාජයට පත් කරමින් මොසුල් නුවරදී ‘ඓතිහාසික’ ජයක් ලැබුවද අයි.එස් සංවිධානයට එරෙහිව යුද්ධය තවමත් අවසන් නැතැයි ඉරාකයේ සිටින ඇමෙරිකා හමුදාවේ ජ්‍යෙෂ්ඨ අණදෙන නිලධාරියෙක් ප්‍රකාශ කළේය.  

බී.බී.සී පුවත් සේවය හා එක්වෙමින් ලුතිනන් ජෙනරාල් ස්ටීවන් තවුසන්ඞ් ඒ බව ප්‍රකාශ කළේය. තවමත් අයි.එස් සටන්කාමීන් ඉරාකය තුළ සිටින බව ද ඔහු එහිදි පැවැසීය. 

ඉරාකය රජය අයි.එස් සටන්කාමීන්ගේ ඉලක්ක වෙත ළඟා වුව ද ජිහාද්වාදීන් නැවත සංවිධානය වැළැක්වීමට පියවර ගත යුතු බව ද කීවේය.

“අයි.එස් සංවිධානය පරාජය කළත් ඔවුන් නැවත නැගී සිටීමේ අවදානමක් තියෙනවා. එම නිසා අයි.එස් සංවිධානය නැවත නැගී සිටීම වැළැක්වීමට ඉරාක ආණ්ඩුව කඩිනමින් පියවර ගත යුතුයි” යැයි ඔහු කීය. 

මොසුල් නුවර අයි.එස් සටන්කාමීන්ගෙන් මුදා ගත් ඉරාක අගමැති හයිදර් අල් අබාදි ඉකුත් දිනෙක ප්‍රකාශ කළේය. මොසුල් නුවර මුදා ගැනීමේ සටන මාස නවයක් පුරා පැවැති අතර නගරයේ බොහෝ ගොඩනැගිලි මේ වනවිට සුන්බුන් බවට පත්ව තිබේ. ගැටුම්වලින් දහස් ගණනක් ජීවිතක්ෂයට පත්වූ අතර 920,000කට වැඩි පිරිසක් අවතැන්ව ඇතැයි වාර්තා සඳහන් කරයි. 

මොසුල් නුවර යනු අයි.එස් සංවිධානයේ ප්‍රධානම බලකොටුවක් වූ අතර එය අත්පත් කරගත් බව ප්‍රකාශයට කරමින් ඉරාක අගමැතිවරයා එම ප්‍රදේශයේ සංචාරයක ද නිරත විය. එහිදි ඉරාක අගමැතිවරයා හමුදා එක්වෙමින් ඉරාක ධජය ද එසවීය. 

ඉරාක හා ඒකාබද්ධ හමුදා ජනගහනය වැඩි ප්‍රදේශවලදී අනවශ්‍ය ලෙස ශක්තිමත් අවි භාවිත කර ඇතැයි ජාත්‍යන්තර ක්ෂමා සංවිධානය වාර්තාවක් නිකුත් කරමින් අඟහරුවාදා දිනයේදී සඳහන් කළේය. 

දරුණු අපරාධ කළ බවට අයි.එස් සංවිධානයට ද ජාත්‍යන්තර ක්ෂමා සංවිධානයේ චෝදනා එල්ල වී තිබේ.  

(ඒ.එෆ්.පී/රොයිටර් ඇසුරිනි 055)