ගංජා හේන් වටලන්න ගුවනින් මෙහෙයුමක්

(ඉන්දිකා රාමනායක)

ගුවන් හමුදාව සහ විශේෂ කාර්ය බලකාය එක්ව සිදුකළ ඒකාබද්ධ ගුවන් මෙහෙයුමක් මඟින් අද (21) හම්බේගමුව කුඩාඔය සහ තණමල්විල යන ප්‍රදේශවල අක්කර 04 ක් පුරා වගා කර තිබූ  ගංජා හේන් 08 ක් විනාශ කළ බව විශේෂ කාර්ය බලකායේ අණදෙන නිලධාරී නියෝජ්‍ය පොලිස්පති වරුණ ජයසුන්දර මහතා පැවසීය.

යුද්ධයෙන් පසු ඒකාබද්ධ ගුවන් මෙහෙයුමකින් ගංජා හේන් වැටලු ප්‍රථම අවස්ථාව මෙය බවද වරුණ ජයසුන්දර මහතා කීය.

මෙම ගංජා හේන් සම්බන්ධයෙන් ගුවන් හමුදා නියමුවන් රහිත යානා වලින් සහ බීච් කාෆ්ට් යන නීරීක්ෂණ යානා මඟින් ලබාගත් තොරතුරු මත විශේෂ කාර්ය බලකායේ විශේෂ අවි හා උපක්‍රම ඒකකය කණ්ඩායම් 08 ක් විසින් හෙළිකොප්ටර් යානා තුනක් උපයෝගි කරගෙන සිදුකළ බවද වරුණ ජයසුන්දර මහතා කියා සිටියේය.

විශේෂ කාර්ය භට පිරිස් එකවරම ගුවනේ සිට ගංජා හේන් මත ගුවනේ සිට පතිත වෙමින් මෙම මෙහෙයුම සිදුකර ඇති අතර ගංජා පැළ 1,59,630 ක් සම්පුර්ණයෙන්ම ගිනි තබා විනාශ කළ බවද වරුණ ජයසුන්දර මහතා සඳහන් කළේය.

මෙම සිද්ධිය සම්බන්ධයෙන් සැකකරුවන් තිදෙනෙක්ද අත්අඩංගුවට ගෙන පොලිසියට ඉදිරිපත් කළ  බවද ඒ මහතා කීය.

ගංජා හේන් විනාශ කිරීම සඳහා මේ ආකාරයේ සාර්ථක ගුවන් මෙහෙයුම් තවදුරටත් ක්‍රියාත්මක කරන බවද වරුණ ජයසුන්දර මහතා වැඩිදුරටත් පැවසීය.

(ඡායාරූප සහ වීඩියෝ - විශේෂ කාර්ය බලකාය මධ්‍ය අංශය)