ගයාන් සූරියආරච්චි

සංවිධානාත්මක අපරාධ කල්ලි සාමාජික ඉෂාරා සෙව්වන්දි නමැත්තිය නේපාලයේ දී අත්අඩංගුවට ගැනීමත් සමග 2025 වසරේ ජනවාරි 1 වැනිදා සිට මේ දක්වා සංවිධානාත්මක අපරාධවලට සම්බන්ධ කාන්තාවන් 18 දෙනකු අත්අඩංගුවට ගෙන ඇති බව අපරාධ වාර්තා කොට්ඨාසය පවසයි.

අත්අඩංගුවට ගෙන ඇති කාන්තාවෝ වයස අවුරුදු 20-45 අතර පසු වෙති. එසේ අත්අඩංගුවට ගෙන ඇති කාන්තාවන් සංවිධානාත්මක අපරාධකරුවන් සමග සමීප සම්බන්ධතා පවත්වමින් ගිනිඅවි ප්‍රවාහනය, ඔත්තු බැලීම, මත්ද්‍රව්‍ය ජාවාරම යන අපරාධවලට ආධාර අනුබල දී ඇති බවට විමර්ශනවලින් තොරතුරු හෙළිවී ඇත.
අත්අඩංගුවට ගෙන ඇති බොහෝ කාන්තාවන් මත්ද්‍රව්‍ය ජාවාරමට සම්බන්ධ වූවන් වන අතර විදේශ රටවල සිට මෙරට අපරාධ මෙහෙයවන සංවිධානාත්මක අපරාධකරුවන් ඇතුළු අපරාධකරුවන්ට මොවුන් අපරාධ සඳහා ආධාර අනුබල ලබා දී ඇති බව පොලිසිය පවසයි.

සංවිධානාත්මක අපරාධ කල්ලි නායකයකු වන සංජීව කුමාර සමරරත්න නොහොත් ගනේමුල්ල සංජීව නමැත්තා ඝාතනය කිරීමෙන් අනතුරුව නේපාලයට පලාගොස් සැඟවී සිටි ඉෂාරා සෙව්වන්දි, යාපනයේ පදිංචි ජේ. කේ. බායි, ජැෆ්නා සුරේෂ්, නන්දකුමාර් තක්ෂි, නුගේගොඩ පදිංචි ශ්‍යාමන්ත සිල්වා නොහොත් බබී, ගම්පහ පදිංචි නිශාන්ත කුමාර නොහොත් බබා නමැත්තන් බස්නාහිර පළාත් උතුර අපරාධ කොට්ඨාසයේ අධ්‍යක්ෂ සහකාර පොලිස් අධිකාරී රොහාන් ඕලු‍ගල, අපරාධ පරීක්ෂණට දෙපාර්තමේන්තුවේ නිලධාරීන් ඇතුළු පොලිස් කණ්ඩායමක් ඉතා රහසිගතව සිදු කළ විමර්ශනවලින් අනතුරුව නේපාලයේ කත්මණ්ඩු නුවර සැඟවී සිටිය දී අත්අඩංගුවට ගනු ලැබූහ.

අත්අඩංගුවට ගත් සැකකරුවන් අපරාධ පරීක්ෂණ දෙපාර්තමේන්තුවේ සහ පොලිස් විශේෂ කාර්ය බළකායේ නිලධාරින් විසින් ඉකුත් 15 දා කටුනායක ගුවන්තොටුපොළට රැගෙන ආ අතර ඉෂාරා සෙව්වන්දි, යාපනයේ පදිංචි ජේ.කේ. බායි, ජැෆ්නා සුරේෂ්, නන්දකුමාර් තක්ෂි නමැති සැකකාරියන් සහ සැකකරුවන් කොළඹ අපරාධ කොට්ඨාසයට භාර දී ඇත. නුගේගොඩ පදිංචි ශ්‍යාමන්ත සිල්වා නොහොත් බබී නමැත්තා බස්නාහිර පළාත් දකුණ අපරාධ කොට්ඨාසයටත්, ගම්පහ පදිංචි නිශාන්ත කුමාර නොහොත් බබා නමැත්තා බස්නාහිර පළාත් උතුර අපරාධ කොට්ඨාසයටත් භාර දී ඇත.