ඉන්දික හේවාවිතාරණ
පසුගිය කාලයේදී විදේශ රටවලින් අධික ලෙස මුං ඇට ගෙන්වීම නිසා මෙවර යල කන්නයේ අස්වනු සඳහා ගොවීන්ට නිසි මිලක් නොලැබෙන බව ගොවි සංවිධාන සඳහන් කරයි. යල කන්නයේදී වැඩි වශයෙන්ම මුං ඇට වගා කර තිබෙන්නේ රාජංගණය කලාපයේ හා තණමල්විල ප්‍රදේශවලය. 

ප්‍රදේශ රැසක කුඹුරුවල ද මුං ඇට වගා කර තිබේ.
 මේ වන විට මුං ඇට කිලෝවක ගැනුම් මිල රු. 275-300 අතර පවතින බවත්, මුං ඇට කිලෝවක් නිෂ්පාදනය කර ගැනීම සඳහා ගොවීන්ට රු. 275-300 අතර මුදලක් වැය වෙන බවත් ගොවි සංවිධාන සඳහන් කරයි.
 යල කන්නයේදී කුඹුරුවල අතිරේක වගාවක් ලෙස මුං ඇට විශාල ලෙස වගා කිරීම සිදුකෙරුණ ද අස්වැන්න නෙළන කාලයේදී මුං ඇට තොග සැලකිය යුතු ප්‍රමාණයක් විදේශ රටවලින් ආනයනය කෙරේ.
 එම මුං ඇට කිලෝවක් රු. 800 ඉක්ම වූ මුදලකට අලෙවි කරමින් තිබෙන නිසා රජය මැදිහත් වී සාධාරණ මිලකට ගොවීන්ගෙන් මුං ඇට මිලදී ගෙන සතොස හරහා ජනතාවට සාධාරණ මිලකට අලෙවි කිරීමේ වැඩපිළිවෙළක් සකස් කළ යුතු බවද ගොවි සංවිධාන සඳහන් කරයි.
 මෙරට මුං ඇට අවශ්‍යතාවෙන් සියයට 50කට වැඩි ප්‍රමාණයක් විදේශ රටවලින් ගෙන්වන හෙයින් දේශීය ගොවීන් දිරිමත් කර රටට අවශ්‍ය මුං ඇට මෙරට නිෂ්පාදනය කර ගැනීමේ වැඩපිළිවෙළක් සකස් විය යුතු බවද පෙන්වා දෙයි.