ශ්රී ලංකා නිදහස් පක්ෂය සුරැකීමේ නව සංවිධානය වටා පාර්ලිමේන්තු මන්ත‍්‍රීවරුන් 18ක්, ආසන සංවිධායකවරු 24ක් සහ ආණ්ඩුකාරවරයෙකු සිටින බව ශ්රී ලංකා නිදහස් පක්ෂයේ කඩුවෙල සම සංවිධායක ජී. එච් බුද්ධදාස මහතා කොළඹදි අද (3) පැවැසීය.
ශ්රී ලංකා නිදහස් පක්ෂය සුරැකීමේ සංවිධානය කොළඹ මහජන පුස්තකාලයේදි කැඳවූ මාධ්‍ය හමුවකදී ඒ මහතා මේ බව සදහන් කළේය.
එහිදී වැඩිදුරටත් අදහස් දැක්වූ ජී. එච් බුද්ධදාස මහතා මෙසේද කීවේය. ‘‘ශ්රී ලංකා නිදහස් පක්ෂයේ උන්නතිය වෙනුවෙන් අපේ ජීවිත කාළයම කැපවෙලා තියෙනවා. ඒත් අද අපි ඉතාම වේදනාවෙන් පසුවෙනවා. ශ්රී ලංකා නිදහස් පක්ෂය සුරැකීමේ සංවිධානය දැන් ඉතාම ශක්තිමත්ව ඉදිරියට යමින් තිබෙනවා. අද වනවිට අපිට ශ්රී ලංකා නිදහස් පක්ෂයේ මන්ත‍්‍රීවරු 21 දෙනාගෙන් 18ක් පැහැදිලිවම අපිත් එක්ක ඉන්නවා. ආසන සංවිධායකවරු 24ක් ඉන්නවා.
තිරය පිටිපස්සේ ආණ්ඩුකාරවරයෙකුත් ඉන්නවා. මේ ශක්තිය තුළින් තමයි අපි භය නැතුව එළියට බැහැලා මේ විදියට කටයුතු කරන්නේ.
මෛත‍්‍රිපාල සිරිසේන මහතා අපි එළවනවා කියලා තියෙනවා. අපි පක්ෂයෙන් එලෙවුවත් ශ්රී ලංකා නිදහස් පක්ෂයේ. ගහලා එලෙවුවත් අපි එක්සත් ජාතික පක්ෂයට හෝ වෙන පක්ෂයකට යන්නේ නැහැ.
මේකත් හරියට වතුර බේසමකට රබර් බෝලයක් දාලා අතින් අල්ලන් ඉන්න තාක් කල් බොලේ උඩ එන්නේ නැහැ. අත ගත්ත ගමන් තමයි බෝලේ උඩ එන්නේ. අන්න එතකොට ඒ 18 දෙනා එළියට ඒවි.
මෛත‍්‍රිපාල සිරිසේන මහතා පුන පුනා කිවුවා මම ඉන්නතාක් කල් ජීවිතේට මහින්ද රාජපක්ෂ කෙනෙකුට මේ රටේ අගමැති කෙනෙක් වෙන්න දෙන්නේ නැහැ කියළා. දෛවයේ සරදමක් වගේ එතුමා විසින්ම මහින්ද රාජපක්ෂ මහතා අගමැති බවට පත් කළා.
ඒ ඒක්කම කිවුවා පාර්ලිමේන්තුවේ 225ම අත්සන් කළත් රනිල් වික‍්‍රමසිංහ මහතාට අගමැති කම දෙන්නේ නැහැ කියලා. දුන්නොත් ජනාධිපතිකමේ පැයක්වත් ඉන්නේ නැහැ කිවුවා. දැන් පැය නෙමෙයි සති ගාණක් වෙනවා තවමත් මෛත‍්‍රිපාල සිරිසේන මහතා අස්වුනේ නැහැ.
ජනාධිපතිවරයා මේ රටේ ව්‍යවස්තාව උල්ලංගනය කළා කියළා අගවිනිසුරුතුමා ඇතුලූ ශ්‍රේෂ්ඨාධිකරණයේ විනිසුරුවන් 07ක් ඒකමතිකව තින්දුවක් දිලා තියෙනවා. අද ජනාධිපතිවරයා මේකට කොටු වෙලා ඉන්නවා. මේක එතුමන්ට ඉතාම අසුබ පෙර නිමිත්තක් විදියට තමයි අපි දකින්නේ.
