”යකෙකුගේ” ප‍්‍රහාරයට ලක්වූ කාන්තාවක ප‍්‍රතිකාර ලබා ගන්නට රෝහලකට ගොස් ඒ බව පොලිසියට පැමිණිලි නොකරන ලෙස ඉල්ලා සිටි බව කියන පුවතක් සියනෑවේ රෝහලකින් වාර්තාවේ.

හිස පැලී ඇඟ පත නිල්වන්නට පහර කෑමට ලක්වූ කාන්තාවක ප‍්‍රදේශයේ රෝහලට ප‍්‍රතිකාර ලබා ගැනීම සඳහා ගියේ කුඩා දරු දෙන්නාද සමගය. තමා වැටීමකින් තුවාල ලද බව ඇය වෛද්‍යවරයාට කීවාය. රෝගී කාන්තාව පරීක්ෂා කළ වෛද්‍යවරයා මෙම තුවාල සිදුව ඇත්තේ වැටීමකින් නොව පහරදීමකින් බව අනාවරණය කර ගෙන ”කවුද ගැහැව්වේ” යැයි ඇගෙන් විමසීය.

”නැහැ වැටුණා” යි ඇය නැවත නැවතත් කියද්දී වෛද්‍යවරයා බොරු නොකියන ලෙසට ඇයට අවවාද කළේය. බොරු කීමෙන් පලක් නැති නිසා ඇය අන්තිමේ සත්‍ය පවසන්නට තීරණය කළාය. ”අනේ දොස්තර මහත්තයෝ මට යකා ගැහැව්වා” ඇය හඬා වැටෙමින් කීවාය. හැමදාම මේ යකා මට ගහනවා අමාරුම හින්දා අද බේත් ගන්න ආවා යැයිද ඇය කීවාය. ඒත් මේ බව පොලිසියට නම් කියන්න එපා ඇය බැගෑපත් වූවාය.

කාන්තාවගේ ප‍්‍රකාශයෙන් වෛද්‍යවරයා කැලඹුනත් ඒ බවක් නොපෙන්වා මොන යකාදැයි අසද්දී කාන්තාව නිහඬව සිටියදී පිළිතුරු දුන්නේ ඇගේ දරුවෙකි. ”මහත්තයා යකා කියන්නේ අපේ තාත්තාට” මේ දරුවා කියද්දී සියල්ල අවබෝධ කරගත් වෛද්‍යවරයා ඇයට අවශ්‍ය ප‍්‍රතිකාර නියම කර පිටත් කර හැරියේ පොලිසියට දැන්වුවහොත් කාන්තාවට යළි මුහුණදීමට සිදුවන දේ ගැන වැටහුණ නිසාය. ඇගේ සැමියාගේ අන්වර්ථ නාමය යකා බව පසුව සොයා බැලීමේදී වෛද්‍යවරයාට දැන ගන්නට ලැබී තිබිණි.