(හක්මන විශේෂ දෙනගම යසන්ත ආරියසේන)
දීර්ඝ නිවාඩු කාලයකින් පසු රාජකාරියට ගොස් වැටුප් ලෙඛනයේ අත්සන් කිරීමේදී තම සැමියාගේ නම සටහන් කළ බිරියක් පිළිබඳව දකුණු පළාතේ නගරාසන්න ප්‍රසිද්ධ ආයතනයකින් වාර්තා වේ.
කොවිඩ් 19 වයිරසය පැතිරයාම හේතුවෙන් වසර එක හමාරක් පමණ මෙම ආයතන පද්ධතිය වසා තිබූ අතර දැනට සති කිහිපයක සිට අදියර මට්ටමින් ඒ ඒ අංශ අනුව රාජකාරි කටයුතු ආරම්භ කළේය.
තරුණු අඹු සැමි යුවළ විවාහ වසරක්වත් ගත නොවන අතර සැමියා නගරයේ ප්‍රකට ව්‍යාපාරිකයෙක් විය.
නිවාඩු කාලය නිසා නිවෙසට වී නිකරුණේ කාලය ගත කිරීමට අපහසු හෙයින් සැමියා සමග ව්‍යාපාරික ස්ථානයට යාම ඇය පුරුද්දක් කරගත්තාය. නිරෝධායන ඇදිරි නීතිය ක්‍රියාත්මක වූ කාලයේදි වුවද වෙළෙඳ‌ාම් කටයුතු කරමින් දෙදෙනා කටයුතු කළ අතර නිවාඩු කාලය අවසන් වූ බිරියට රැකියාවට යාමට සිදුවිය
වසර එක හමාරකින් පමණ සේවා ස්ථානයේ හිතමිතුරන් සමග ආගිය තොරතුරු කතා බහා වෙමින් සිටියදී ඇයට කාර්යාලයට පැමිණෙන ලෙස ආයතන ප්‍රධානියාගෙන් කැදවීමක් ලැබිණි.
කඩිමුඩියේ කාර්යාලයට ගිය ඇයට පසුගිය මාසවල වැටුප් ලේඛනයේ අත්සන් කරන ලෙස ප්‍රධානියා උපදෙස් දුන්නේය. සිය නම ඉදිරියෙන් අත්සන් කර හරි සර් කියා ඇය පිටව ගියාය. ප්‍රධානියා විසින් වැටුප් ලේඛන එදින සවස ප්‍රධාන කාර්යාලයට බාරදීම ද සිදුකළේය. පසුදින ප්‍රධාන කාර්යාලයේ ගිනුම් අංශයෙන් ලොකු සර්ට ඇමතුමක් ලබා දී පවසා සිටියේ වැටුප් ලේඛනයේ අත්සනක් වැරදි බැවින් එය නිවරැදි කර නැවත ගෙනවිත් දෙන ලෙසය.
වෙනත් නිලධාරියකු කාර්යාලයට යවා වැටුප් ලේඛනය පරික්ෂා කිරීමේදී ප්‍රමාද වී අත්සන් කළ නිලධාරිනිය අත්සන වෙනුවට වෙනත් නමක් ලියා තිබීම නිසා ඔහු යක්ෂාරූඪ විය. වහාම එම නිලධාරිනිය කාර්යාලයට කැදවා සිදුකළ වැරැද්දට අවවාද කළේය. මේ කාගේ නමක් දැයි ලියල තියෙන්නේ යැයි විමසීමේදී සැමියාගේ නම යැයි ඇය වෙව්ලමින් පැවසුවාය.
වසර එක හමාරක් පමණ නිවාඩු කාලයේදී ඇය විසින් සැමියාගේ ව්‍යාපාර කටයුතු වල මුදල් ගනුදෙනු සිදුකිරීමට චෙක්පත් වල සැමියාගේ නම නිතරම ලිවීම නිසා එම පුරුද්දට මෙලෙස ලියවුණ බව සඳහන් කරමින් සිදුවූ අතපසුවීමට සමාව ඇය ද සිටියාය.
සිහි කල්පනාව ඇතිව වැඩකරන ලෙස ප්‍රධානියා ඇයට උපදෙස් දුන් අතර එම අවස්ථාවේ කාර්යාලය තුළ සිටි සහෝදර සේවකයකු සිද්ධිය අසා සිටීම නිසා කතාව සේවක මණ්ඩලය අතර පැතිර යාමට වැඩි කාලයක් ගත නොවීය.
කාර්යාලීය මිතුරු මිතුරියන් සැමියාගේ නම පවසමින් ආමන්ත්‍රණය කරමින් කරන උසුළු විසුළු වලින් බේරීම සඳහා ඇයට එම සතියේ නිවාඩු දමා ගෙදර සිටීමට සිදුවිය.
