(දෙනියාය විශේෂ එස්.ඩී.කොඩිකාර )
දින දර්ශනයක් කාර්යාලයේ බිත්තියේ ගැසූ බවට උරණ වී එම කාර්යාලයේ සේවය කළ නිලධාරීයකු සේවයෙන් පහ කළ ආයතන ප්‍රධානියකුගේ පුවතක් වතු සමාගමකට අයත් කාර්යාලයකින් පසු ගිය දින වාර්තා වේ.
එදින සතියේ වැඩ කරන කාර්යාල දිනයකි.
කාර්යාලයේ නිලධාරීන්ටද කාර්ය බහුල දිනයකි. කෙතරම් කාර්යබහුල ද කිවහොත් කාර්යාලයේ දිනයක් බලා ගැනීමට පවා දින දර්ශනයක් බිත්තියේ ගසා ගැනීමටවත් ඔවුන්ට වේලාවක් නොවිණි.
එදින හදිසියේ කාර්යාලයට ගිය නිලධාරියකු කාර්යාලයේ තිබූ දින දර්ශනයක් කාර්යාලයේ බිත්තියේ ප්‍රදර්ශනය කළේ එහි දිනයක් බලා ගැනීමටවත් දින දර්ශනයක් නොමැති කම හේතුවෙනි.
ආයතන ප්‍රධානියාද මෙම නිලධාරියා සමඟ ඇයි හොඳයිකම් අඩු කර තිබුණේ ආයතනයේ ඇතැම් දේ ඉහළ කළමනාකාරීත්වයට දැනුම් දෙන්නේ යැයි ඔහු සිතා සිටි බැවිනි.
මෙය මෙම නිලධාරියාට පාඩමක් උගන්වන්නට හොඳ අවස්ථාවක් යැයි සිතූ ආයතන ප්‍රධානියා දින දර්ශන පාර්සලය මාගේ අවසරයකින් තොරව කැඩුවේ කවුදැයි විමසා බලා අදාළ නිලධාරියා සේවයෙන් පහ කර ඇත්තේ කිසිදු හේතුවක් නොමැති කම නිසා බව පැවසේ.
අවසානයේ ආයතන ප්‍රධානියාටද හිටි හැටියේ ස්ථාන මාරුවක් ලැබෙන්නේ ඔහුගේ වැඩ ගැන ඉහළ කළමනාකාරිත්වය දැන ගැනීමෙන් බවද පැවසේ.
